Un equipo científico gadoupa de Vigo para determinar a poboación de xardas adultas que hai no Cantábrico

Investigadores do do Instituto Español de Oceanografía (IEO) partiron onte de Vigo a bordo do buque oceanográfico Miguel Oliver, da Secretaría Xeral de Pesca, para emprender a campaña Jureva, que se desenvolverá ata o 24 de abril no caladoiro do Cantábrico Noroeste e o golfo de Biscaia, zonas ás que a flota galega adoita desprazarse en busca de xarda, bocarte e outras especies na súa maioría peláxicas.

O labor desta misión é estimar canta biomasa desovante de cabala hai. Farase a partir do método de produción de ovos, que se colleitan con redes de plancto, para calcular a abundancia de reprodutores. Tamén se analizará a presenza doutras especies comerciais que desovan na primavera, como a sardiña e a anchoa.

A Juvena complementa a campaña de investigación Careva (realizada no mes de marzo, tamén a bordo do Miguel Oliver), e coordínase, ademais, coa Pelacus, que comezará a principios de abril. Todas elas están dirixidas ao estudo de especies peláxicas. Pola natureza migratoria da cabala durante o seu prolongado período reprodutivo e a súa distribución desde o norte de Europa a Portugal, os datos das tres campañas combínanse cos doutras 16 que entre xaneiro e xullo realizan sete países. Os resultados coordínanse no marco dos grupos de traballo do ICES (Consello Internacional para a Exploración do Mar, polas súas siglas en inglés). Estes equipos elaboran os correspondentes informes sobre o estado das poboacións das diferentes especies e as súas perspectivas e escenarios futuros.

Estas especies son capturadas, principalmente, «pola flota dos censos de cerco, enmalle, arrastre e artes menores do Cantábrico Noroeste, polo que a obtención dos datos desta campaña é un piar fundamental para a avaliación destes stock e a adopción de medidas de xestión adecuadas e proporcionadas, así como a asignación do TAC e as cotas», explican o IEO e o Ministerio de Pesca nun comunicado.

---

---

---