No encontro abordouse a decisión de limitar a cinco metros as cordas de captación de semente
26 mar 2025 . Actualizado á 22:40 h.A unidade do sector mexilloeiro é, a estas alturas, unha das quimeras da ría. Dela falou o conselleiro de Mar, Alfonso Villares, durante unha reunión da Comisión do Mexillón. Nese encontro, explican desde a Xunta, «instou ao sector a abordar a necesidade de agrupar a todos os produtores da comunidade para reforzar o papel de interlocución das súas entidades representativas na toma de decisións que afectan a súa actividade».
A fragmentación do sector é evidente. A directora xeral de Pesca, Acuicultura e Innovación Tecnolóxica, Patricia García, destacou no mesmo foro que «das 3.573 bateas instaladas na costa galega só 2.370 forman parte dalgunhas das 45 asociacións actuais que agrupan estes viveiros». É dicir, hai máis de 1.200 bateas que «van por libre», como se adoita dicir nos portos.
Vilares sinalou que «a miticultura é un sector esencial para a comunidade, tanto en termos de facturación como de emprego, que sitúa a Galicia como referente a nivel europeo. Para reforzar ese liderado e asumir con garantías os desafíos actuais resulta imprescindible que os produtores actúen cunha soa voz na defensa desta actividade extractiva». Por iso, o conselleiro fixo unha chamada á reflexión para atopar «un espazo común que permita unir forzas en favor do interese do mexilloeiro, buque insignia da acuicultura na comunidade e dun produto recoñecido internacionalmente pola súa excelencia así como símbolo da gastronomía galega».
Colectores
Na reunión da comisión tamén se fixo fincapé no adianto da época autorizada para a colocación de colectores, cuxo número tamén aumentou, aínda que a súa lonxitude diminuíu. Estas decisións adoptáronse «polo cambio das condicións oceanográficas e ambientais que provocan desprendementos do mexillón e que, en determinadas épocas, tamén afecta ao desprendemento de mexilla». Con estas medidas, din desde a Xunta, o Goberno galego que encabeza Alfonso Rueda «mantén a súa aposta por medidas que melloren e optimicen o funcionamento dun sector estratéxico, así como a súa competitividade».