O PP leva a pleno unha moción na que se demanda ao goberno central o dragado
28 mar 2025 . Actualizado á 02:02 h.O Partido Popular de Pontevedra levará ao pleno da Deputación unha moción na que solicita ao Gobierno de España a execución urxente do dragado do Miño para frear a súa deterioración e mellorar as súas condicións ecolóxicas. Ademais, os populares piden medidas complementarias como a erradicación de especies invasoras que afectan o ecosistema fluvial.
O deputado provincial e alcalde da Guarda, Roberto Carrero, acompañado polos portavoces populares do Baixo Miño, expuxo a iniciativa xunto á canle do río, destacando a urxencia da intervención. «É fundamental que se tomen medidas entre España e Portugal para frear o deterioro do río, que causa graves prexuízos socioeconómicos, pesqueiros, turísticos e de seguridade á nosa bisbarra», explicou Carrero.
A sedimentación e a proliferación de especies invasoras como a lavaza están a reducir drasticamente a canle do río, o que xerou problemas como a supresión do servizo de ferri entre Caminha e A Guarda desde 2021 por falta de calado. Ademais, a situación actual compromete a seguridade en caso de rescates ou emerxencias na zona.
Carrero criticou a actitude do subdelegado do Gobierno, Abel Losada, asegurando que «admite que é necesaria a dragaxe, pero estas palabras, como sempre que falamos do PSOE e da provincia de Pontevedra, nunca veñen acompañadas de feitos». Tamén denunciou que o representante estatal «se agoche en excusas, xustificacións, adiamentos e estudos, sen tomar medidas concretas».
O PP insiste en que a recuperación do río Miño debe ser unha prioridade e que se require unha acción coordinada entre España e Portugal para preservar este importante recurso natural e económico. A moción debaterase no pleno da Deputación de Pontevedra coa esperanza de lograr o respaldo necesario para impulsar unha solución efectiva.