Un petroleiro e un cargueiro incéndianse ao chocar ao nordeste de Inglaterra

Reuters

O petroleiro de bandeira estadounidense Stena Inmaculate, de 183 metros de eslora, e o portacontedores de pavillón portugués Solong, de 140 metros, están en chamas tras chocar na mañá deste luns fronte á costa da localidade de Hull, en East Yorkshire, no nordeste de Inglaterra, informa axénciaa Efe. Dos 37 tripulantes dos dous mercantes, foron rescatados 36 e, citando fontes gobernamentais, o diario británico The Times publica que se dá por desaparecido a un membro da dotación do Solong.

A medida que pasan as horas van coñecéndose detalles da carga que transportaban os buques. Tras facerse público que o Stena Inmaculate tiña nos seus tanques combustible para a aviación militar de EE.UU., transcende que entre a carga do Solong había 15 colectores de cianuro de sodio.

Ao redor das cinco da tarde, os remolcadores e buques de emerxencias que anteriormente se atopaban na contorna dos buques sinistrados, lanzando auga e tratando de conter os incendios, afastáronse deles. Geolocalizadores permiten comprobar que ás seis da tarde unhas 15 embarcacións mobilizadas pola colisión permanecen a unha distancia prudencial, a unhas dúas millas do Stena Inmaculate e do Solong. O buque cisterna continúa transmitindo datos sobre a súa posición, pero o cargueiro deixaría de emitilos pouco antes das doce da mañá.

Pasadas as seis da tarde, as autoridades británicas seguían tratando de estimar o alcance do ou das verteduras de carburantes. Informacións atribuídas a Crowley, a empresa que xestiona o Stena Inmaculate, indican que un dos tanques rotos no choque contiña «combustible Jet-A1», queroseno empregado para a aviación militar de EE.UU.

O Stena Inmaculate transportaba combustible para aviación, parte do cal se derramou ao mar, publican medios británicos como The Times ou a BBC. Imaxes difundidas pola BBC, recibidas de testemuñas no lugar, mostran o que parecen ser as dúas embarcacións rodeadas dun espeso fume negro e varios puntos en chamas. Segundo a Real Institución de Botes Salvavidas (RNLI, en inglés), os tripulantes puideron abandonar as barcos, aínda que o seu estado se descoñece, e témese o impacto ambiental da colisión, engade Efe.

 

O director do porto de Grimsby, Martyn Boyers, confirmou que 37 tripulantes foron trasladados a terra, aínda que non transcendeu se queda por localizar algún membro das dotacións. A ministra laborista de Transporte, Heidi Alexander, expresou a súa preocupación en X e está en contacto cos servizos de rescate para ver como evoluciona a situación. «Agradezo aos traballadores dos servizos de emerxencia os seus esforzos para responder o suceso», declarou.

A axencia Efe tamén se fai eco de información do portal dixital Navy Lookout, que ofrece análises independentes sobre a Mariña británica, explicou na mesma rede social que o petroleiro MV Stena Immaculate sería  embestido polo buque portacontedores MV Solong, cando o primeiro estaba ancorado fronte ao estuario de Humber, a uns 16 quilómetros de terra.

Outros portais de seguimento marítimo, como Marine Traffic Data, indican que MV Stena Immaculate, que procedía do porto grego de Agioi Theodoroi, ten bandeira estadounidense mentres que o Solong -que saíu do porto escocés de Grangemouth en dirección a Países Baixos-, enarbora pavillón portugués.

Despregamento de medios de auxilio

A axencia británica de gardacostas HM Coastguard confirmou que, tras recibir a alerta ás 10:48 (hora española), despregou varias embarcacións, algunhas con capacidade para extinguir incendios. Tamén se desprazou un helicóptero de rescate da Garda Costeira de Humberside, xunto con botes salvavidas das localidades de Skegness, Bridlington, Maplethorpe e Cleethorpes. Participan así mesmo nos labores de rescate unha aeronave de á fixa de Coastguard, así como embarcacións próximas con capacidade de extinción de incendios, apunta Efe.

---

---

---