O TJUE interpreta a exención do imposto de sociedades ao Porto de Bilbao como axuda de Estado

O Tribunal de Xustiza da Unión Europea (TJUE) desestimou o recurso de casación presentado pola Autoridade Portuaria de Bilbao contra a decisión do Tribunal Xeral da UE que interpretaba que a exención do imposto de sociedades aplicada pola Deputación Foral de Biscaia era unha axuda de Estado incompatible co mercado interior, como advertira a Comisión Europea a España.

A Xustiza comunitaria en primeira instancia confirmou que a exención fiscal dera ao Porto de Bilbao unha vantaxe competitiva, pero a autoridade portuaria alegou que non se tivera en conta o principio de autosuficiencia económica do sistema portuario que está recollido na lexislación nacional sobre os portos estatais e que o tribunal utilizara unha xurisprudencia «non automaticamente aplicable» ao caso porque só afectaba o porto de Bilbao.

O TJUE, con todo, clarifica que o feito de que só afecte a un único beneficiario non é obstáculo para que o tribunal aplique ese principio, cre que si se tivo en conta tamén a autosuficiencia económica e confirma, por tanto, que a exención é equiparable a unha axuda de Estado ilegalmente concedida.

---

---

---