O Goberno declara zona catastrófica a costa afectada pola vertedura de pélets

O Goberno aprobou este martes axudas para os damnificados polo incendio urbano que se produciu o pasado 22 de febreiro na cidade de Valencia , para os afectados pola contaminación por pélets procedentes do mercante Toconao que sufriron as costas de Galicia, Asturias e Cantabria nos primeiros días de xaneiro do 2024 e outras 57 urxencias de protección civil rexistradas desde o 25 de setembro do 2023.

O Consello de Ministros declarou zonas afectadas gravemente por unha urxencia de protección civil (Zaepc) os territorios afectados por eses episodios catastróficos, que provocaron danos persoais, en infraestruturas e en bens públicos e privados, así como danos en masas forestais, cultivos, areais e explotacións agropecuarias, polígonos industriais e outras instalacións produtivas, prexuízos «de tal magnitude que xustifican a aprobación de axudas estatais baseadas no principio de solidariedade interterritorial e con carácter subsidiario e complementario ás actuacións que, en exercicio das súas competencias, teñen encomendadas as Administracións territoriais», explica o Ministerio do Interior nun comunicado.

Nesas urxencias inclúese «a vertedura de pélets fronte ás costas de Portugal e a súa posterior chegada e dispersión polas praias de Galicia, Asturias e Canarias nos primeiros días do 2024». Pero non é o único episodio catastrófico que afectou a Galicia. Inclúese na declaración o incendio forestal que afectou a Trabada (Lugo) e outro que requiriu a activación dunha situación operativa por risco químico, que foi o lume orixinado na planta de residuos industriais nas Somozas (A Coruña).

Esta declaración permite que o Estado poida outorgar axudas «sen necesidade de dispor dunha avaliación de danos, á vista da información dispoñible». Entre eses subsidios, cuxa concesión corresponde ao Ministerio do Interior, figuran axudas aos titulares de establecementos industriais, mercantís e de servizos, incluídos os agrarios, marítimo-pesqueiros e turísticos (ata 9.224 euros) e a corporacións locais por gastos derivados de actuacións inaprazables (entre o 50% e o 100% do custo, segundo os casos).

Así mesmo, o acordo aprobado polo Consello de Ministros abre a posibilidade de adoptar outras medidas de apoio, como beneficios fiscais no imposto sobre bens inmobles (IBI) ou a cota do imposto sobre actividades económicas (IAE) que corresponden aos receptores destas axudas, que como é habitual estarán exentas do IRPF; medidas laborais e de Seguridade Social, como exencións das cotas, e axudas aos concellos para reparar instalacións ou repor infraestruturas públicas.

Reacción tardía 

A solicitude de declaración de zona catastrófica foi solicitada pola Xunta no apoxeo da vertedura de pélets, que onte criticou a demora do Goberno: «Chama a atención que o Goberno tome estas decisións 19 meses despois dos incendios forestais do verán do 2022 e tres meses despois do incidente do buque Toconao», explicaron fontes da Consellería do Mar. Explican, así mesmo, que a Xunta pagou en poucas semanas as axudas aos damnificados polos incendios e que contratou ata 400 profesionais para limpar as praias «mentres o Goberno central desatendía a súa función de loita contra a contaminación marítima». Xa que logo, esa declaración de zona catastrófica e a habilitación do do fondo de continxencia «é un recoñecemento, moi tardío, de que o Goberno central non fixo o seu traballo cando debía».

No caso da vertedura de o Toconao, «a Xunta analizará polo miúdo o acordo do Consello de Ministros e agarda que ampare as perdas económicas sufridas polos mariscadores nos últimos meses e que contribúa a reparar o desprestixio ao sector que determinados partidos políticos provocaron por causas electorais», conclúen.

---

---

---