Congalsa consolida o seu crecemento e no 2023 facturou 151 millóns de euros
SOMOS MAR
A empresa reuniu ao seu persoal, que ampliou ata acadar os 697 empregados
04 feb 2024 . Actualizado ás 12:29 h.É xa unha tradición que Congalsa reúna ao seu persoal a principios de febreiro para dar conta dos resultados económicos ao longo do exercicio anterior, e é igualmente tradicional que nese acto se fale do crecemento da compaña da Pobra, convertida en líder no sector da fabricación de alimentos ultracongelados a base de peixes e mariscos. Este ano non foi unha excepción, e a firma segue consolidándose e ampliando o seu volume de negocio. No 2023, a súa facturación volveu crecer ata acadar os 151 millóns de euros.
Nunha distendida gala que reuniu a boa parte do persoal, non faltou o inevitable e sentido recordo ao fundador da empresa, Luis Simarro, falecido o pasado domingo. Cunhas breves palabras do director de recursos humanos, Juan Carlos Rama, na súa memoria comezou un acto no que os responsables da compaña deron a coñecer os resultados económicos do ano pasado e os obxectivos para o presente exercicio, no que Congalsa aspira a dar continuidade e afianzar a senda de crecemento que mantivo nos últimos anos.
No 2023, o grupo empresarial, integrado por Congalsa e a filial portuguesa Sulpasteis, que a firma pobrense adquiriu no 2020, acadou unha facturación de 151 millóns de euros, un 14 % que no ano precedente, cando a cifra se situou por amais dos 132 millóns e o crecemento respecto ao exercicio anterior foi do 17 %. Mantense, pois, unha tendencia á alza sostida no tempo e regular.
Este aumento do volume de negocio leva aparellado tamén un crecemento do persoal de traballadores. Durante o 2023, a compaña incorporou novo persoal ata rozar os 700 empregados. En concreto, son 697 as persoas contratadas, un 3 % máis que un ano antes. Neste sentido, fontes da empresa destacan que o persoal se está rexuvenecendo, e o 40 % teñen menos de 35 anos.
Un dos obxectivos da empresa á hora de organizar a gala, celebrada no pavillón da Fieiteira para dar cabida a todo o persoal, é fomentar a cultura de pertenza e conseguir a adhesión de todos os membros da compaña para que estean en liña cos obxectivos estratéxicos, e desde a empresa móstranse moi satisfeitos polo grao de compromiso mostrado polos traballadores coa súa ampla participación no acto, no que, en aras de facilitar a conciliación, este ano habilitouse un servizo de gardería.
Premio Ramón Doval
Para contribuír a fomentar o compañeirismo, Congalsa tamén puxo en marcha hai 11 anos o Premio Ramón Doval ao empregado que mellor teña representado os valores corporativos da empresa, tales como compromiso, respecto ás persoas, orientación ao cliente ou traballo en equipo.
É o propio persoal a que elixe directamente aos gañadores cada ano nunha votación interna, e nesta ocasión o galardón recaeu en María Dolores Rama, que desempeña o seu traballo na área de produción na parcela 13 da firma e que recibiu o recoñecemento de mans de Luis Miguel Simarro, director xeral de Congalsa, e Julio Simarro, director comercial e de mercadotecnia.