A empresa marinense colabora na investigación co CSIC
01 feb 2024 . Actualizado ás 12:05 h.O frigorífico Rosa dos Ventos participa nun proxecto innovador e de investigación que aspira a darlle un uso comercial ás vísceras do polbo e, de paso, reducir o impacto ambiental ao minimizar os residuos que produce a súa actividade industrial.
Pilar Otero, do departamento de Administración de Rosa dos Ventos, unha empresa situada no porto de Marín, explicou as liñas xerais deste proxecto no marco dunha visita do conselleiro do Mar, Alfonso Villares , este mércores á súa nave.
Otero explicou que esta empresa participou noutras experiencias pioneiras e innovadoras, grazas á colaboración de institucións científicas e subvencións para o seu estudo e desenvolvemento. Desta forma, en Rosa dos Ventos conseguiuse darlle un uso comercial a las cabezas do polbo e máis recentemente tamén á auga que se emprega na factoría para a cocción do cefalópodo.
Asegurou: «Agora estamos coas vísceras do polbo, que é ao mar o que é o porco na terra, e veremos que podemos conseguir de aí». Otero precisou que neste proxecto contan co asesoramento do Centro Superior de Investigacións Científicas (CSIC). Os estudos realizados por este último organismo subliñaron a presenza en altas proporcións de omega tres, entre outros. Estes informes sosteñen que as vísceras do polbo «teñen bastantes proteínas e aminoácidos» e que se está avaliando a súa posible utilización por parte da industria farmacéutica. Ademais, ao pór en marcha este plan e darlle un uso ao que agora se tira, «intentaremos xerar menos residuos».
Rosa dos Ventos é unha das empresas máis importantes do sector na ría de Pontevedra. A súa especialidade é o procesamiento de cefalópodo, sobre todo polbo galego, e Pilar Otero comentou que exportan en torno ao 30 % da súa produción. En Europa, o polbo galego «está moi valorado», concluíu a representante da empresa frigorífica marinense.