A pesca galega lanza unha ofensiva desde Burela para facer fronte a Bruxelas
SOMOS MAR
Defende que a flota está dimensionada e xa traballa de forma sostible
11 may 2023 . Actualizado ás 04:45 h.Guiada polos cantos de sirena das organizacións conservacionistas, a Comisión Europea adoptou unha «deriva medioambientalista» que está a pór en perigo a supervivencia do sector pesqueiro en xeral e do galego en particular. Este último cre que chegou a hora de parar os pés a Bruxelas . Decidiuno en Burela , onde onte, co gallo da apertura de portas da feira náutico-pesqueira Expomar, reuniuse no pleno do Consello Galego de Pesca . Nesa reunión constatouse «a necesidade de actuar dende todas as frontes para frear os plans de Bruxelas de restrinxir a pesca en augas comunitarias de xeito totalmente arbitrario, poñendo en marcha distintas estratexias para a protección dos ecosistemas pero sen informes científicos que xustifiquen esas limitacións á actividade extractiva», expuxo a Consellería do Mar ao termo do encontro.
E cando se di «todas as frontes» son todas: política, diplomática, social e xudicial. Toda unha ofensiva desde Burela para parar os pés a Bruxelas e evitar que se repitan barbaridades» como o veto á pesca de fondo en 87 zonas comunitarias aprobada a finais do ano pasado e a previsión de aumentar ata un 50 % esas áreas protexidas na próxima revisión. Se en outubro se fixo tomando como basee datos parciais —só do arrastre—, desactualizados e sen análise de impacto socioeconómico, a modificación que está por vir tamén se expón sobre un informe científico que, de novo, só se sustenta en datos do arrastre e solicitados entre o 2009 e o 2011. Despropósitos como este , «non poden repetirse»subliña a conselleira Rosa Quintana, quen avogou por apagar aqueles cantos de sirena transmitindo á sociedade «como está traballando a frota pesqueira, como se ten modernizado moito na extracción dos recursos, que é un sector competitivo e preocupado pola conservación do medio no que atopa sustento e que a pesar da súa escasa pegada hídrica e de carbono se ve sometido aos ataques das organizacións conservacionistas que conseguen guiar á Comisión nas súas políticas».
Estudos de impacto
Presionarán con todas as súas forzas para que o palangre poida recuperar as súas áreas de traballo entre os 400 e 800 metros dos 87 espazos acoutados e para que medidas como a de vetar o arrastre no 20 % das augas de cada Estado membro xa no 2024 non leven adiante sen informes de impacto socioeconómico. E no caso de que realmente sexan necesarias medidas, estas deberán «aplicarse de xeito gradual» para evitar danos colaterais, como «unha concentración de buques nos mesmos caladoiros» ou a «sobreexplotación das pesqueiras que quedan dispoñibles».
Doutro xeito, as limitacións abocan á flota galega a unha reestruturación que non quere nin necesita, pois «está perfectamente dimensionada», como o demostra o feito de que «a maioría de especies que captura a frota galega atópanse no rendemento máximo sustentable (RMS)».
Por iso ata aquí chegaron. «A pesca ten futuro se as autoridades europeas llo permiten e, en vez de poñerlle atrancos, comezan a traballar para atopar resposta a algúns dos seus principais desafíos, como a remuda xeracional ou a descarbonización», atallou Quintana.
