A Xunta aprema ao Estado a incluír ás industrias do mar no PERTE alimentario
SOMOS MAR
Conserveiras e conxeladores non poden acceder a fondos para aforro enerxético e sustentabilidade
10 ago 2022 . Actualizado ás 19:09 h.A unha norma comunitaria atribuíron as industrias de transformación de produtos do mar (conserveiras e conxeladoras) ter quedado parcialmente excluídas do proxecto estratéxico para a recuperación e a transformación económica (PERTE) do sector alimentario español. Segundo explicaron desde as patronais Anfaco-Cecopesca e Conxemar, poden acceder a fondos para I+D+i, pero non para o seu programa de aforro enerxético e sustentabilidade. Por carta, a Xunta empraza ao ministro de Agricultura, Pesca e Alimentación, Luis Planas, «a rectificar con axilidade» e incluílas nese PERTE.
Diego Calvo e Rosa Quintana, conselleiros de Presidencia e de Mar, apreman a corrixir o que consideran «un despropósito máis do Goberno central coa cadea mar-industria», apunta un comunicado de Mar. Durante a visita que realizaron este mércores á empresa Actemsa, na Pobra do Caramiñal , detallaron que na misiva se expón «a inquedanza xerada por representantes do Goberno central ao afirmar de xeito erróneo que algunhas destas empresas están amparadas pola Política Agraria Común».
Conserveiras e conxeladoras galegas exportaron o ano pasado produtos do mar transformados por valor de 2.400 millóns de euros, engade a Xunta.
