Seragro presenta en Lugo un programa sobre recría, innovación e benestar animal nas súas Xornadas de Vacún de Leite
GANDERÍA
O encontro reunirá a máis de 700 profesionais en Lugo os días 13 e 14 de novembro
03 oct 2025 . Actualizado á 10:44 h.Unha nova edición das Xornadas Técnicas de Vacún de Leite de Seragro celebraranse os días 13 e 14 de novembro no Auditorio da Facultade de Veterinaria de Lugo, coa participación de máis de 700 profesionais entre gandeiros, técnicos e expertos.
O programa comezará o xoves 13 coa intervención de José Manuel Andrade Calvo, director da Fundación Juana de Vega (A Coruña), quen analizará a situación actual do sector galego. A continuación, Felipe Fraga Martínez, do Servizo de Recría de Seragro, abordará os principios de ventilación e orientación de naves. Laura Molina Moreno, profesora asociada na Facultade de Veterinaria de Córdoba, tratará as enfermidades en idades temperás e o seu impacto.
Despois da pausa, Sandra Mella Ríos, de Leira Fonteboa (A Coruña), compartirá experiencias sobre recría, seguida de Ares Rubies Corrales, auxiliar veterinaria en Granxa San José (Huesca), que falará sobre a recría como base do futuro vacún. Pola tarde, o estadounidense Jordan T. Matthews, socio de Rosy Lane Hosteins LLC (Wisconsin), exporá a importancia das persoas e as vacas nos resultados produtivos. Posteriormente intervirán Sonia Rodríguez Pazos, do Servizo de Reprodución de Seragro, sobre inseminación; Liliana Fadul, analista en Lactanet, sobre tipos de muxido; e Miguel Iglesias Naredo, xefe de produto vacún de leite en Deheus, sobre alimentación en sistemas robotizados. A xornada concluirá co Encontro Gandeiro.
O venres 14, María Jesús Asorey Cea e Noa García Rey, de AUSUM, Asesores e Avogados, abrirán a sesión cun relatorio sobre o marco laboral no sector agrario e gandeiro. Víctor Novo Vázquez, xefe do Servizo de Sanidade e Produción Vexetal da Consellería do Medio Rural, presentará o Caderno de Campo. Javier Fernández López, do Servizo de Podoloxía de Seragro, falará sobre revisión e traballo por lotes, e Arturo Gómez, veterinario consultor en Zinpro, exporá un cambio de paradigma na prevención da saúde podal.
Pola tarde, Javier Bueno Lema, profesor no Campus Terra de Lugo, intervirá sobre tecnoloxía e intelixencia natural no sector. Carlos Liste Pose, socio de Gandería Liste SL (Trazo, A Coruña), compartirá a súa experiencia en xestión de forraxes con maquinaria propia, e Juan Carlos Lodos Pérez, socio de SAT Lodos e Pérez (A Pastoriza, Lugo), farao sobre a produción sen maquinaria. Finalmente, Pol Llonch Obiols, veterinario experto da Plataforma Benestar Animal da Comisión Europea, explicará o papel da intelixencia artificial e a análise de datos no sector leiteiro. As xornadas concluirán co acto de clausura e o tradicional brinde do leite.