A Xunta reforza o Observatorio do Sector Lácteo para mellorar a información que ofrece e a súa transparencia

O Observatorio Lácteo de Galicia foi creado no ano 2007 co obxectivo de ofrecer información sobre un dos sectores máis importantes da economía galega. Pero, co paso do tempo e os cambios que experimentaron tanto os produtores como as industrias, esta entidade quedouse obsoleta. Por iso está previsto que no próximo Consello da Xunta déase o visto e prace a un decreto que regulará a nova estrutura e o sistema de funcionamento deste  organismo co obxectivo de aumentar a cantidade de información que ofrece e mellorar a súa transparencia e calidade na publicación de datos.

Explica a Consellería do Medio Rural que, con este cambio, búscase mellorar este órgano colexiado de asesoramento, consulta e análise do sector lácteo, para dotalo de ferramentas que permita a toma de decisións empresariais e de estratexia do mercado. Engaden, ademais, que o cambio era necesario para poder adaptar esta entidade á  a realidade actual do consumo de produtos lácteos e dos mercados. 

A nova norma cambia a composición do Observatorio para poder incluír a todos os elos da cadea de valor do sector lácteo: produtores, industria, distribución e consumo. Redefínense tamén as funcións da presidencia, da secretaría e das vogalías que o conforman, que pasan a ser 21 en total. Medio Rural tamén destaca que se incorporou a unha das vogalías á organización de produtores lácteos de Galicia con maior representatividade, o que obedece á necesidade de que nesta entidade estean representados todos os sectores que traballan directa ou indirectamente co lácteo.

Outro dos cambios consiste en permitir a creación de grupos de traballo nos que poidan participar persoas expertas  do sector lácteo alleas ao Observatorio. Medida que se toma para fortalecer o seu funcionamento ordinario. Ademais, engádense ás funcións desta entidade o estudo da cadea de valor e das relacións comerciais e contractuais entre os distintos elos da cadea, pola importancia que esta materia ten no sector lácteo e na determinación dos prezos. 

Para rematar, establécese un período máis amplo entre cada reunión do pleno do Observatorio, que pasará de ser trimestral a anual. Con iso permitirase que os integrantes poidan contar con datos consolidados á hora de exercer as funcións atribuídas a esta entidade. Aínda así, engaden no medio Rural, inclúese tamén a posibilidade de que se poidan celebrar as reunións que sexan precisas, sen someterse a esta periodicidade e en sesións extraordinarias. 

A consellería lembra que o sector lácteo é un motor da economía agraria galega, que no 2023 produciu máis de 2,9 millóns de toneladas de litros de leite, que acadaron un valor superior aos 1.500 millóns de euros pagos aos produtores galegos. Dotar a este sector dunha ferramenta de planificación estratéxica e que achegue transparencia e información dunha forma eficaz é o obxectivo da reforma que, prevese, o Consello da Xunta aprobará hoxe luns. 

---

---

---