Axentes ambientais acusan a Medio Rural de «falta de previsión e planificación» na campaña contraincendios

Máis de 200 axentes ambientais participaron este xoves nunha asemblea en Santiago como protesta ante a falta de compromiso e de diálogo da Xunta. A Asociación Profesional de Axentes Forestais e Medioambientais de Galicia (Aprafoga) e outras organizacións sindicais denuncian o incumprimento de compromisos acadados cos axentes ambientais. Entre eles, citan a redacción do regulamento de funcións da nova escala de axentes técnicos en xestión ambiental, ao que se comprometeu a Xunta en acordos asinados no 2016 e no 2019, e o encadre dos traballadores no grupo B, convocando un proceso para pasar a ese grupo unha vez que o colectivo acadase o 40% de axentes coa titulación do ciclo superior, o que aseguran que non se fixo a pesar de superarse esa porcentaxe hai anos.

Cuestionan tamén o incumprimento da revisión de condicións de traballo, sen porse en marcha unha comisión de seguimento, e demandan o aumento de prazas xa que, a pesar de aumentar as súas competencias e carga de traballo, «temos o mesmo persoal que hai 40 anos cando se transferiron as competencias á Xunta».

Aprafoga e sindicatos critican ademais á Consellería do Medio Rural «pola falta de previsión e planificación, xa que se están a realizar chamamentos para cubrir prazas en plena época de alto risco, podendo facelo con antelación á campaña de alto risco de incendios, con persoal sen experiencia e sen coñecemento do territorio». Cargan tamén contra a convocatoria o mércores, un día antes da asemblea, para crear a Unidade de Directores de Extinción (UDEX), cunha proposta que cualifican de ridícula e insuficiente: aseguran que con só seis especialistas en dirección de extinción a unidade nace morta, xa que demandan un mínimo de 40 efectivos, con dez prazas de nova creación por provincia.

Lembran que tras a vaga de incendios do 2017 houbo un compromiso parlamentario para crear 57 novas prazas de axentes, que nunca se cumpriu. Critican ademais que a Xunta non realizase medidas organizativas para facer fronte ás novas xeracións de incendios nos montes, «lumes que se comportan con maior velocidade de propagación e maior virulencia e que os fai moito máis perigosos para as persoas e bens materiais e cada vez precisan de maior especialización».

Neste contexto, Aprafoga e sindicatos non descartan iniciar medidas de presión, valorando futuras manifestacións, aínda que agardan non ter que recorrer á folga como en anos anteriores. Como paso previo, os axentes ambientais solicitarán reunións coas conselleiras de Medio Rural e Medio Ambiente, así como co de Facenda, para intentar solucionar os incumprimentos da Administración.

---

---

---