A Deputación axuda a agricultores e a gandeiros a comercializar mellor os seus produtos
26 nov 2019 . Actualizado á 11:19 h.A zona de O Xistral é coñecida pola súa paisaxe ou por peculiaridades da súa flora como as turbeiras. No entanto, nese territorio, que inclúe parte de concellos do norte de Terra Chá e de A Mariña, hai tamén actividade agrícola e forestal, para a que se estudan agora formas de lograr unha mellor comercialización.
A cita máis inmediata terá lugar o vindeiro sábado, na Casa da Cultura de Ferreira do Valadouro. Con Abadín, Muras, Ourol, Alfoz, Xove e Viveiro, O Valadouro ten terreo incluído no proxecto Life in Common Land, que impulsa a Deputación de Lugo coas universidades de Santiago de Compostela (USC) e da Coruña (UDC) para buscar melloras socioeconómicas aproveitado os recursos relacionados co territorio.
No acto do sábado abordaranse novas posibilidades de comercialización con exemplos de iniciativas gandeiras e agrícolas en marcha. A venda en liña de carne de Os Ancares, a distribución de carne de boi nun territorio reserva da biosfera (Allariz) ou a comercialización de cultivos agrarios cun selo oficial (IXP Faba de Lourenzá) serán asuntos presentes na xornada. Esta acción, como outras incluídas no programa Life in Common Land, pretende que se manteñan as actividades tradicionais.
Luis Reija, xefe de servizo de Medio Ambiente na Deputación, destacou onte que se contaba cunha notable vantaxe inicial. En O Xistral, dixo, prodúcese carne de vacún procedente de reses que pastan no monte gran parte do ano, cun sistema practicamente ecolóxico e cunha calidade que é apreciada. O pendente, agregou, é buscar novas formas de difusión, tanto en grandes como en pequenas superficies.
Cabalos e mel
Ademais do gando vacún, neses municipios hai gañado cabalar de monte e unha actividade apícola para a que ultimamente se buscan máis saídas. A Feira do poldro de Muras, que se celebra en A Gañidoira, ten un arraigamento de décadas, e algún ano incluíu xornadas gastronómicas como actividade complementaria, Máis recente é o comezo da feira do mel murense, que se celebra en O Viveiró.