Por primeira vez un equipo gaña 6.000 euros de premio
28 ago 2025 . Actualizado a las 05:00 h.A Televisión de Galicia emite hoxe o programa número 35 do Eu sei + ca ti, o concurso revelación do verán co presentador máis bailongo, Fran Nogueira. Será unha entrega moi especial, pois, por primeira vez desde a súa estrea, un equipo logrará abrir a caixa forte e levar para a casa o ansiado bote de 6.000 euros.
O formato, que combina humor, curiosidades, música e moita competitividade, estreouse hai pouco máis dun mes e xa se converteu nunha cita obrigada do prime time de domingo a xoves. Tres equipos compiten en cada programa en diferentes fases: unha rolda contra o reloxo na que hai que responder con cifras exactas, outra na que os equipos se retan para demostrar quen sabe máis sobre un tema, e unha proba musical que elimina o equipo máis feble. Despois, os dous mellores equipos teñen que enfrontarse a unha batería de preguntas de verdadeiro ou falso que dá acceso á gran final. Alí hai tres preguntas que os poden axudar a dar coa combinación da caixa forte e facerse co bote. O compoñente de azar é moi forte, xa que terán que decidir cal é a orde exacta dos díxitos que lles quedarán por completar nunha clave composta por dez números.
Ata o de agora, o programa xa repartiu 7.650 euros en premios diarios, pero ningún equipo conseguira levar o premio gordo de 6.000 euros. Esta noite, todo vai cambiar. Pero quen serán os protagonistas desta fazaña? O equipo gañador sairá de entre Os Cucos —formado polos amigos Gara, Martín e Meri—, As do Castro —unha familia composta por Pili, Belén e Candela— e Os Escalenos —integrado polos compañeiros de traballo Marcos, Antonio e Suso—. Que equipo será o afortunado? Sacarán partido da súa xuventude os máis novos ante as preguntas random do concurso? Poderán beneficiarse as viguesas da súa conexión familiar? Ou serán os profesores de instituto os que tiren proveito do temario que imparten nas aulas? A resposta, hoxe no horario de máxima audiencia da TVG.