Este anuncio chega despois do lanzamento da nova versión do modelo de linguaxe e tras as críticas que suscitou a ferramenta hai pouco polo seu antisemitismo
21 jul 2025 . Actualizado á 13:06 h.O multimillonario Elon Musk anunciou que a súa empresa de Intelixencia Artificial (IA) desenvolverá unha nova aplicación dedicada ao contido infantil á que bautizou co nome de Baby Grok, pouco máis dunha semana despois do lanzamento de Grok 4, a nova versión do modelo de linguaxe da firma estadounidense.
«Imos crear Baby Grok xAI, unha aplicación dedicada a contido para nenos», comunicou o empresario nunha concisa publicación na rede social X, sen ofrecer máis detalles sobre o proxecto.
A comezos deste mes, a compaña xAI presentou a versión Grok 4 da súa chatbot, tan só uns meses despois a súa actualización anterior, presentándoa como «a IA máis intelixente do mundo» ao ser capaz de superar o nivel de doutoramento.
O anuncio de Grok 4 e de Baby Grok chegaron nun momento delicado para a empresa de Intelixencia Artificial de Musk, que hai apenas uns días tivo que pedir desculpas publicamente pola publicación de contido «inapropiado» —de carácter antisemita— que a compaña achacou, no entanto, a «un fallo na actualización dunha ruta de código do bot».