Os partidos políticos ven difícil un acordo para designar ao futuro director da CRTVG
SOCIEDADE
A nova lei permite renovar a cúpula dos medios públicos galegos con maioría absoluta
12 may 2025 . Actualizado á 19:33 h.A reunión informal levada a cabo o luns polos grupos políticos con representación na Cámara galega tiña como obxectivo avanzar na renovación da dirección dos medios públicos galegos. Pero, tal e como estaba previsto, non se chegou a ningún acordo. Tanto BNG como PSdeG non barallaron ata o de agora ningún nome, apostando máis pola definición dun perfil. Pero ningunha das dúas forzas da oposición cre que se chegará a un consenso para substituír a Alfonso Sánchez Izquierdo, a cargo da CRTVG desde o 2009, cando o PP recuperou o mando da Xunta con Alberto Núñez Feijoo.
A oposición entende que o Partido Popular fará valer a súa maioría para nomear un candidato, unha vez modificada a normativa de elección dos medios públicos. O procedemento para a elección do director ou directora xeral de CRTVG é o mesmo que o Goberno de Pedro Sánchez, con apoio dos seus socios, aplicou en Radio Televisión Española. En virtude do cambio realizado pola Executivo vía decreto, José Pablo López puido saír elixido presidente do ente público RTVE por maioría absoluta tras non conseguir a maioría de dous terzos.
Na reunión, que durou apenas media hora e á que asistiron Alberto Pazos (PPdeG), Olalla Rodil (BNG) e Lara Méndez (PSdeG), non se abordaron posibles nomes para a posible candidatura que relevaría ao actual director da compaña.
Tampouco se concretaron aspectos sobre o perfil ou o currículo que debería ter o candidato máis indicado para dirixir nesta nova etapa os medios públicos audiovisuais de Galicia, que pasarán a denominarse Corporación de Servizos Audiovisuais de Galicia.
A pesar da falta de acordo, os grupos parlamentarios aínda teñen de prazo ata as 10 da mañá deste martes. Posteriormente, ás 10.30 horas, celebrarase a Mesa da Comisión da CRTVG que convocará a reunión que deberá formalizar a «proposta de candidato» de entre as diferentes propostas que puidesen rexistrarse e que, previsiblemente, celebrarase o vindeiro venres 16.
Preguntado ao finalizar o Consello da Xunta, Alfonso Rueda asegurou que vía moi difícil chegar a un acordo debido ao «dogmatismo do BNG».
Mentres tanto, os deputados nacionalistas consideran que os populares imporán un perfil que asegure o control informativo sobre a acción de xestión da Xunta.