O príncipe Guillermo celebra o seu aniversario cos seus fillos no concerto de Taylor Swift
SOCIEDADE
A cantante estadounidense compartiu un «selfie» xunto ao monarca e os príncipes George e Charlotte, que acudiron ao arranque da súa xira «The Eras Tour» no Reino Unido
23 jun 2024 . Actualizado á 17:35 h.O príncipe Guilermo cumpriu este venres 42 anos, e decidiu celebralo con todo o alto, aproveitando a oportunidade para gozar do evento do que medio mundo fala: a xira mundial de Taylor Swift, The Eras Tour, no seu paso por Europa.
O herdeiro da Coroa británica acudiu ao gran concerto inaugural da xira británica en Londres xunto aos seus dous fillos maiores, George e Charlotte, para gozar como tres swifties máis das cancións da artista norteamericana. E non se cortaron nin un pelo. A Guillermo pillárono dándoo todo ao ritmo de Shake it Off no palco do estadio de Wembley, nunhas imaxes gravadas desde as bancadas inferiores e que se viralizaron en redes sociais.
Pero o certo é que o príncipe de Gales e os seus fillos non son tres swifties calquera. Os membros da familia real británica tiveron unha oportunidade única, xa que puideron coñecer ao seu ídolo en persoa. E a estadounidense non deixou pasar a oportunidade de inmortalizar ese momento cun selfie, como non podía ser doutro xeito. Na foto, que leva xa máis de oito millóns de likes en Instagram, aparecen a cantante en primeiro plano co príncipe e os seus dous fillos xunto o actual noivo da artista, o xogador de fútbol americano Travis Kelce. De paso que compartiu a fotografía en redes, Swift aproveita xa o post para felicitar ao ao príncipe polo seu aniversario. «Feliz aniversario, colega!», escribe informalmente Swift no texto que acompaña á imaxe. «Os concertos de Londres empezaron xa de forma prometedora», engade.
Tamén o propio Guillermo compartiu este momento para o recordo, noutra imaxe na que se percibe a alegría de Guillermo e, especialmente, de George e Charlotte por coarse no camerino da artista do momento. «Grazas, Taylor Swift, por unha gran noite!», exclama na súa publicación en redes o primoxénito de Carlos III.
Para o príncipe Guillermo non é a primeira vez en compartir espazo con Taylor Swift. A última vez coincidiron, ademais, sobre o escenario. O herdeiro real, a estadounidense e o cantante Jon Bon Jovi subíronse a un palco durante un evento solidario en Londres e cantaron a viva voz entre os tres Living on a Prayer.
Non foi, ao parecer, a única presenza da realeza no estadio de Wembley. A revista británica Hello! asegura que incluso houbo representación española. Conta o magacín que a infanta Sofía participou tamén neste evento, e que iría acompañada doutra royal, a princesa Catalina Amalia de Orange, herdeira da coroa dos Países Baixos. O que non se sabe, porque xa é cousa da rumoroloxía, é se tamén estaba con elas a princesa Leonor.