Morgan Spurlock, o director que comeu durante todo un mes en McDonald's, morre de cancro con 53 anos
SOCIEDADE
O documental «Super Size Me», do ano 2004, forzou á industria de comida rápida a incluír máis ensaladas nos seus menús e eliminar o menú extragrande
24 may 2024 . Actualizado á 18:26 h.Morgan Spurlock tivo unha idea hai sete anos. O documentalista, director e produtor do estado de Virginia Occidental, nos Estados Unidos, quería facer a proba empírica que lle permitise responder á pregunta de se as hamburguesas de McDonald's, a principal cadea mundial de comida rápida do mundo, eran boas, malas ou moi malas. Decidiuse entón a alimentarse unicamente de hamburguesas, nuggets de pito e refrescos durante todo un mes e recoller o día a día da súa experiencia nun documental titulado Super Size Me (2004).
Spurlock faleceu este xoves aos 53 anos por «complicacións derivadas dun cancro», como informou a súa familia este venres. «Foi un día triste, xa que nos despedimos do meu irmán Morgan. Achegou tanto a través da súa arte, ideas e xenerosidade. O mundo perdeu a un verdadeiro xenio creativo e a un home especial», expresou no comunicado o seu irmán Craig Spurlock, que traballou con Morgan en diversos proxectos.
Spurlock alcanzou recoñecemento internacional tras aquel revolucionario Super Size Me, que tamén o situou ao bordo do paro cardíaco. Non só recibiu un nomeamento ao Óscar, senón que impulsou o debate acerca do abuso de comida rápida nos Estados Unidos e cambiou moitos paradigmas sobre os problemas de alimentación. A raíz deste documental o sector da alimentación industrial meteu máis ensaladas nos seus menús e eliminou o menú extragrande. Aínda hoxe a súa produción serve como ferramenta educativa en colexios e institutos de todo o país.
O documentalista rodou a segunda versión da súa oscarizada peza audiovisual, titulada Super Size Me 2: Holy Chicken (2019), enfocándose nas presións das grandes cadeas de comida rápida sobre as pequenas granxas avícolas familiares, pero esta segunda entrega non tivo tanta aceptación, como informa Efe.
O legado de Spurlock condensa decenas de proxectos onde tratou temas controvertidos para a sociedade estadounidense que abarcaron o traballo da poboación migrante (30 Days), a Guerra de Afganistán (Where in the world is Osama Bin Laden?), o poder da mercadotecnia no sistema capitalista (The Greatest Movie Ever Sold) e a moda das modificacións corporais (7 Deadly Sins), entre outros.
A aposta de Spurlock, segundo os seus familiares, sempre foi a mesma: «Desafiar sen medo as convencións modernas utilizando o humor e o enxeño para guindar luz sobre os problemas», reza o comunicado.
A través da súa produtora Warrior Poets, Spurlock tamén desenvolveu decenas de series de televisión con difusión nacional nos Estados Unidos durante máis de trece anos.
A familia de Spurlock pediu no seu comunicado deste venres que aquelas persoas que o desexen fagan doazóns á Sociedade Americana do Cancro - Hope Lodge (Nova York) «en honra a Morgan».