O aumento de brotes desta enfermidade levou a unha demanda de inmunizacións sen precedentes
19 abr 2024 . Actualizado á 17:32 h.A Organización Mundial da Saúde (OMS) anunciou a aprobación dunha nova vacúa contra o cólera, a surcoreana Euvichol-S, administrable por vía oral. A súa autorización coincide nun momento de crecentes brotes, casos e falecementos pola enfermidade a nivel global.
A nova vacúa ten unha eficacia similar á das xa existentes pero unha fórmula máis simplificada, o que podería permitir un incremento da produción destes medicamentos, indicou un comunicado da OMS.
O laboratorio surcoreano EuBiologicals xa lograra a inclusión na lista da OMS doutras dúas vacinas orais contra a enfermidade, Euvichol e Euvichol-Plus. Ademais das inmunizacións de EuBiologicals, a OMS inclúe na súa lista outras dous similares, Dukoral e Shanchol, tamén por vía oral.
O pasado ano calcúlase que houbo polo menos 700.000 casos globais de cólera, un forte aumento fronte aos 473.000 de 2022, que xa dobraron as cifras do ano anterior. O aumento no número de falecidos a nivel mundial tamén foi destacado, pois dos 2.350 de 2022 pasouse a máis de 4.000 o pasado ano.
Na actualidade detectáronse brotes da enfermidade en 23 países, con situacións especialmente graves en República Democrática do Congo, Etiopía, Mozambique, Somalia, Zambia, Zimbabue e Comoras.
Gavi, a Alianza para as Vacinas, e UNICEF celebraron a noticia. Aseguran que a precalificación deste novo produto axudará a EuBiologics, o fabricante, a producir máis volumes de vacina, máis rápido e a un custo máis baixo, un paso crave para expandir a subministración no medio do aumento global de brotes de cólera.
A aprobación axudará a aumentar a subministración xeral de vacinas orais contra o cólera dispoñibles no 2024; agora prevense aproximadamente 50 millóns de doses para estar dispoñibles no stock global este ano, en comparación cos 38 millóns do 2023. Euvichol-S é unha importante innovación de produto: unha formulación simplificada de Euvichol-Plus que reduce o número de compoñentes da vacina garantindo que segue sendo igualmente efectiva contra os serogrupos clave do cólera, á vez que reduce o custo e a complexidade de produción.
O cólera aumentou a nivel mundial desde o 2021, con altas taxas de letalidade a pesar da dispoñibilidade dun tratamento simple, efectivo e alcanzable. O gran número de brotes levou a unha demanda sen precedentes de vacinas por parte dos países afectados. Aínda que a subministración global de vacinas orais contra o cólera aumentou dezaoito veces entre o 2013 e o 2023, o grande e sostido aumento da demanda puxo presión sobre o stock global de vacinas contra o cólera. Os aliados e os países están a traballar urxentemente en medidas de resposta, prevención e control do cólera ante esta crise, e pediron apoio a países e fabricantes, entre outros. Máis recentemente, Gavi, UNICEF e os aliados anunciaron o despregamento global máis grande de diagnósticos de cólera para apoiar o seguimento e resposta.
O cólera é unha infección intestinal aguda que adoita propagarse a través de auga e alimentos contaminados, polo que é típica de lugares con pobres condicións hixiénicas, a miúdo zonas sacudidas por conflitos ou crises.
O cambio climático é un factor que empeora a situación segundo a OMS, xa que moitos destes brotes xorden tras catástrofes naturais talles como inundacións, ciclóns e secas, debido á redución do acceso a auga potable que se adoita producir nesas circunstancias.