A compaña incrementa os seus prezos entre un e tres euros ao mes
15 ene 2024 . Actualizado ás 13:53 h.Movistar aplica a partir deste luns unha subida media do 3,1 % ás súas tarifas de fibra, móbil e televisión, despois de que Vodafone teña incrementado un 4,38 % os seus prezos desde o inicio do ano. Orange, pola súa banda, non variou os seus plans de prezos co cambio de exercicio, mentres que MásMovil iniciou o ano cun incremento de dous euros nas súas tarifas de fibra óptica.
As subidas nalgúns produtos de Movistar son de entre un e tres euros. Entre os paquetes que inclúen conexión a Internet, móbil e televisión, Movistar Max e Movistar Ilimitado increméntanse en dous euros, mentres que Movistar Ilimitado x2 e Movistar Ilimitado x4 soben tres euros.
En canto ás tarifas non converxentes —aqueles servizos fóra de paquetes integrados— a subida media sitúase ao redor de dous euros.
A compaña explicou que as subidas non afectan a aqueles clientes que estean a gozar dalgunha promoción comercial e xustificou a alza de prezos nos traballos para ofrecer «un servizo excelente e seguro» grazas a investimentos na rede de fibra e 5G.
Tanto no caso de Movistar como o de Vodafone, estas subidas son menores que as que aplicaron a principios do 2023, cando a marca de Telefónica elevou as súas tarifas de media un 6,8 % e Vodafone, un 8,1 %.
Vodafone detallou pola súa banda que a actualización das súas tarifas, que incrementou os seus prezos en 1,64 euros de media, ten como obxectivo consolidar a sustentabilidade do negocio a longo prazo e asegurar os recursos necesarios para seguir investindo en redes.