Ecovoz, un cuarto de século de divulgación ambiental desde Radio Voz e La Voz
SOCIEDADE
O programa, patrocinado por Sogama, acadará os 25 anos durante este curso
12 nov 2023 . Actualizado á 05:00 h.Un cuarto de século dá para moito e iso, xustamente, é o que cumprirá o programa radiofónico Ecovoz durante este curso en marcha. Espazo ambiental decano en Galicia, posible grazas á implicación desde o inicio da Sociedade Galega do Medio (Sogama), Ecovoz é unha iniciativa impulsada desde Radio Voz Carballo, pero de ámbito autonómico, e cuxa nova edición, a 25.ª, botará a andar no mes de xaneiro. Prestará de novo especial atención aos máis mozos, que son o futuro, a vía de cambio, portadores de información ademais nos seus fogares.
Así, colexios das catro provincias volverán participar nun dos piares do programa, o concurso escolar Ecopreguntoiro, no que semana a semana van medindo os seus coñecementos os grupos participantes, superando eliminatorias ata quedar un gañador. Na 24.ª edición, o Manuela Rial Mouzo de Cee. Neste cuarto de século, Ecovoz foi sumando seccións e sobre todo voces e consellos para axudar a coidar un pouco mellor o mundo, sen desatender as entrevistas a líderes sociais e empresariais que destacan polo seu exemplar traballo no medio ambiente, na xestión de residuos ou na reciclaxe, por exemplo. Conduciunas estes últimos anos María Meizoso, mentres que desde Carballo Fran Rodríguez encárgase do Ecopreguntoiro, apoiados pola colaboración técnica e produción por Víctor Marque e Sonia Rodríguez.
Nestes máis de vinte anos, Ecovoz recibiu diversos recoñecementos, o último deles concedido precisamente a María Meizoso desde o Consello de Administración de Recyclia, que acordou entregarlle o galardón na categoría de mellor labor dun xornalista á difusión da reciclaxe, tanto polo seu traballo nas ondas como polo seguimento que se fai desde as páxinas de La Voz dos programas semanais de Ecovoz. Meizoso desprazarase a Madrid o 20 de decembro para recoller esta distinción de Recyclia que cumpre oito anos entregándose a entidades e medios de comunicación que procuran unha sociedade máis sostible.
Antes do de Recyclia, anteriores títulos chegaron para Ecovoz, desde entidades como Humana Fundación Pobo a Pobo ou a Fundación Instituto para a Sustentabilidade dos Recursos (ISR). Un compromiso que, tendo en conta a natureza do programa, con moito peso do escolar, pódese estender ás comunidades educativas que ano tras ano se implican co programa.