Galicia, a segunda comunidade con menos interrupcións voluntarias de embarazo no 2022
SOCIEDADE
O ano pasado rexistráronse case 3.000 abortos, a maioría no ámbito extrahospitalario. O Sergas derivou a clínicas privadas o 35% dos casos entre o 2019 e o 2022
28 sep 2023 . Actualizado á 19:22 h.Galicia rexistrou no 2022 un total de 2.975 interrupcións voluntarias de embarazo, o que a coloca no segundo posto pola cola das comunidades autónomas en España, só por diante A Rioxa. A cifra total de abortos en España o ano pasado ascendeu a 98.136, un 9% máis que en 2021, das que só o 17% realizáronse en centros públicos e a práctica totalidade foi por decisión única da muller sen ter que ser informada por ningún facultativo.
Por comunidades autónomas, Cataluña volve ser a rexión coa taxa máis elevada de interrupcións voluntarias de embarazo (14,87 por cada 1000 mulleres de entre 15 e 44 anos), seguida da Comunidad de Madrid (12,89) que tamén repite como a segunda comunidade con maior número de IVE; séguelles Andalucía (12,5), Asturias (12,45), Baleares (12,38), Murcia (12,26), País Vasco (11,38) e canarias (10,76).
As rexións con menor taxa de IVE en 2021 foron Ceuta e Melilla (3,82), A Rioxa (6,71), Galicia (7,09), Estremadura (7,51), Castela e León (7,95), Aragón (8,92), Navarra (9,20), Cantabria (9,20), Castela-A Mancha (9,21) e Comunidade Valenciana (9,66).
Na nosa comunidade, un total de 2.414 casos producíronse no ámbito extrahospitalario, 737 destes en centros públicos e 1.677 en privados. Ademais, houbo 561 casos que se realizaron en hospitais, a maioría deles (513) en centros públicos. O perfil maioritario das galegas que decidiron interromper o seu embarazo é dunha muller con estudos de bacharelato ou FP, con parella, sen fillos e que non utiliza métodos anticonceptivos ou utiliza métodos de barreira, en polo menos dúas de cada tres casos.
En canto á franxa de idade, a dos 20 aos 39 anos é a que concentra a maior parte dos casos, aínda que tamén se produciron interrupcións de embarazo entre os 40-44 e entre os 15-19 (268); e incluso houbo seis casos en menores de quince anos.
O 35% foron derivadas a centros privados entre o 2019 e o 2022
O Servizo Galego de Saúde derivou entre 2019 e 2022 ao 35% das mulleres que acudiron á sanidade pública para someterse a intervencións cirúrxicas para interromper de forma voluntaria os seus embarazos.
Así o sinalou o director xeral de Asistencia Sanitaria do Sergas, Jorge Aboal, en resposta a unha pregunta formulada pola deputada do BNG Montse Prado na Comisión 5ª do Parlamento galego, celebrada este xoves.
Alí, Aboal trasladou que entre 2019 e 2022 o Sergas xestionou 11.756 interrupcións voluntarias de embarazo, das cales, 7.644 practicáronse en centros públicos e 4.108 en clínicas coas que a Administración pública ten concertos para a práctica destas intervencións. Ademais, outras 7.416 mulleres acudiron directamente a clínicas privadas para abortar.
A pregunta feita na Comisión de Sanidade pola parlamentaria nacionalista estaba orientada a demandar explicacións pola licitación este verán dun contrato por case 1,4 millóns de euros para os próximos tres anos (prorrogable a cinco) para practicar en clínicas privadas abortos en embarazos de menos de 14 semanas de xestación e sen risco.
Para o portavoz de sanidade do Bloque no Pazo do Hórreo, este contrato responde a razóns «ideolóxicas» dun PP «cada vez máis radicalizado» que permite que se practique a obxección de conciencia de forma «coordinada» e «moita veces alentada» desde as xefaturas de servizo dos hospitais galegos.
Prado preguntouse se «é tan difícil» programar «un aborto á semana» nos hospitais galegos, como así o revelan os datos de que se practica unha media de 57 ao ano por cada centro, o que levou a sentenciar que a Xunta non quere crear un rexistro de obxectores de conciencia para favorecer que estas intervencións leven a cabo en clínicas privadas
Rexistro de obxectores de conciencia
Durante as súas intervencións, Aboal e a deputada frontista encerelláronse pola interpretación do artigo da lei orgánica de 2010 que recolle o dereito ao aborto no que se establece a creación de rexistros de obxectores de conciencia.
En concreto o artigo 19 (ter) desta normativa en vigor desde hai 13 anos establece que cada comunidade autónoma contará cun rexistro de profesionais sanitarios acollidos ao seu dereito a non participar de forma directa en prácticas de aborto, á vez que, a continuación, sinala que o Consello Interterritorial do Sistema de Saúde deberá crear un protocolo específico que recolla as «condicións mínimas» deste rexistro.
Así, Aboal destacou esta segunda cuestión para responsabilizar ao Gobierno central da falta de «avances» na configuración de criterios para crear estes rexistros, mentres que Prado incidiu en que a Xunta obvia o primeiro punto dese artigo que implica ás propias comunidades na configuración dos mesmos.