O Goberno confirma que o seguro para cans e o curso de formación non serán obrigatorios de momento coa lei de benestar animal
SOCIEDADE
O Ministerio de Dereitos Sociais anuncia que «non resulta efectivamente aplicable ata que se produza o desenvolvemento regulamentario do devandito precepto»
27 sep 2023 . Actualizado á 20:37 h.Unha das novidades da lei de benestar animal, que entra en vigor o venres, é a obrigatoriedade de ter un seguro de responsabilidade civil por parte dos donos dos cans. Pero a dirección xeral do Ministerio de Dereitos Sociais e Axenda 2030 acaba de anunciar que este precepto non será obrigatorio de momento, ata que se desenvolva convenientemente a regulación.
Nun comunicado, o director xeral, Sergio García Torres, explica que, aínda que ter un seguro para todo tipo de cans, non só para os das razas perigosas, sería obrigatorio a partir do venres, día 29, «en puridade de termos xurídicos non resulta efectivamente aplicable ata que se produza o desenvolvemento regulamentario do devandito precepto, de conformidade co disposto no mesmo».
Ademais asegura que isto mesmo pasará co curso de formación para a tenencia responsable de cans. «En relación con outras obrigacións reguladas na Lei 7/2023, do 28 de marzo, que requiran desenvolvemento regulamentario, tales como a realización do curso de tenencia responsable ou a identificación de animais incluídos na listaxe positiva que non sexan das especies can, gato e hurón, serán aplicables unha vez entre en vigor o citado desenvolvemento regulamentario».
En canto ao seguro para cans, o documento asegura que, de momento, «deberase atender ao recolleito sobre esta materia nas normativas autonómicas e locais que establecen, nalgúns casos, a obrigatoriedade de dispor de seguro de responsabilidade civil por tenencia de cans».
Lembra, no entanto, que «no caso dos cans potencialmente perigosos, a normativa específica obriga a que a cobertura mínima do seguro sexa de, polo menos, 120.000 euros». O ministerio recomenda consultar ás compañas aseguradoras «para que asesoren sobre os cans que poderían estar incluídos nas pólizas de seguros do fogar, segundo a súa tipoloxía, normativa de aplicación e outros aspectos».
O caos nas aseguradoras
Nas últimas semanas, as aseguradoras viviron un auténtico caos pola incerteza de centos de clientes que querían saber se debían asegurar ás súas mascotas antes deste venres ou non. Juan Manuel Sánchez-Albornoz Gómez, presidente do Consello Galego de Mediadores de Seguros, recoñece que este tema suscitou moitísimo interese no mundo asegurador, que agarda a que a normativa estableza os límites lóxicos para contratar as pólizas..
«Ata o de agora na póliza do fogar ti tiñas a responsabilidade civil dos animais domésticos cuberta, na maioría das compañas (salvo nas baixo custo) —explica Sánchez-Albornoz—. Pero ao converterse en obrigatorio por lei, os seguros multirramo exclúeno. Aí viría o problema».
Ante esta situación as compañas van optar por tres vías diferentes: «A primeira —engade—son as compañas que van reformar os seus condicionados para asumir este seguro en concreto. A segundo serán as que o asuman con condicións (limitando a un número determinado de animais domésticos do tipo que sexa)». Para rematar, hai tamén compañas que xa anunciaron que non o van a cubrir. «Terás que facer unha póliza aparte, específica de animais domésticos». Estas novas pólizas, explica o experto, custarán ao redor dos trinta euros e aproveitarán para cubrir a responsabilidade civil e outros gastos veterinarios de diferente tipo.
De momento, e aínda que o comunicado do ministerio remite ás normativas autonómicas e locais, o certo é que, «a día de hoxe —'que eu saiba', matiza o presidente dos mediadores— ningunha autonomía lexislou sobre animais domésticos en xeral, aínda que si sobre cans potencialmente perigosos. Pode ser que agora algunha autonomía a raíz disto lexisle».