A parella, que cumpriu vinte anos de relación, acaparou a atención no Festival de Cannes, onde o actor acudiu por última vez como Indiana Jones
19 may 2023 . Actualizado ás 09:25 h.Harrison Ford foi este xoves o rei da alfombra vermella de Cannes, por onde pasou por última vez como Indiana Jones xa que o filme que presenta no festival é o peche das aventuras do arqueólogo. O actor acudiu á presentación coa súa muller, Calista Flockhart, e ambos acapararon todos os flashes.
Harrison Ford, de 80 anos e Calista, de 58, coñecéronse na gala dos Globos de Ouro do 2002. Ela estaba solteira, acababa de adoptar ao seu fillo, e el acababa de divorciarse da súa segunda muller. O actor comentou nalgunha ocasión que non pensaba namorarse aos 60 anos, pero «o amor romántico é un dos tipos de amor máis emocionantes e gratificantes, e creo que existe un potencial para iso en calquera etapa da túa vida»,
Onte, en Cannes o equipo deste quinto Indiana Jones foi recibido coa ovación das miles de persoas que rodeaban o palacio, co acompañamento da coñecida música que John Williams compuxo para a primeira entrega do filme, En busca da arca perdida, hai nada menos que 42 anos.
Xunto a Ford, os seus compañeiros de Indiana Jones e o dial do destino: Phoebe Waller-Bridge, Mads Mikkelsen, Boyd Holbrook, Shaunette Renée Wilson e o mozo Ethann Isidore, o máis emocionado de todos.Tamén o realizador do filme, James Mangold, que tivo a difícil tarefa de substituír a Steven Spielberg, responsable das catro entregas anteriores de Indiana Jones.
Ford, cun impecable e clásico esmoquin, pasou dúas veces pola alfombra vermella, primeiro da man de Calista Flockhart, e a segunda co equipo.Desde primeira hora da mañá, os fans agardaban fronte ao Palacio de Festivais de Cannes, algúns mesmo disfrazados como Indiana Jones, aínda que non tiveron ocasión de facerse fotos co seu ídolo, que non se achegou a eles, algo que si fixo Mikkelsen.
Pola alfombra vermella tamén pasou o líder indíxena brasileiro Raoni Metuktire, cun tocado de plumas verdes e amarelas e o seu soado disco labial, coñecido polo seu defensa da selva amazónica e as culturas indíxenas. Igualmente a popular actriz india Aishwarya Rai, cun extravagante vestido abrigo prateado cunha enorme capucha semirígida, unha larguísima cola e un lazo xigante negro.
Outros dos rostros coñecidos que se deixaron ver hoxe na alfombra vermella de Cannes foron o compositor francés Jean Michel Jarre coa súa esposa, a actriz chinesa Gong Li, o realizador británico Steve McQueen ou a modelo brasileira Adeiana Lima.