David Beckham revela novos detalles sobre o seu TOC: «Cando todos dormen, eu limpo as velas usadas e asegúrome de que todo estea ordenado»
SOCIEDADE
Netflix estreará a finais deste ano unha nova serie documental sobre o exfutbolista pola que lle pagaron 18 millóns de euros. O proxecto dirixido por Fisher Stevens mostrará detalles inéditos da súa vida
30 abr 2023 . Actualizado á 10:20 h.Pasaron case vinte anos daquela entrevista na que David Beckham, entón futbolista do Real Madrid, explicou que padecía Trastorno Obsesivo Compulsivo (TOC). «Todo debe estar ordenado en liña recta e [as cousas] sempre deben ser pares. Cando meto os refrescos na neveira, deben ser números pares, se son impares quito un e métoo nun armario distinto», contou o exxogador á cadea de televisión británica ITV no ano 2006.
As primeiras imaxes da serie documental que Netflix estreará sobre a súa vida a finais do 2023 mostran como a súa obsesión pola orde e a limpeza continúan afectando á súa vida. Este xoves, durante un evento da plataforma en Londres, fíxose público un primeiro avance da serie, no que Beckham revela, por exemplo, que se mantén horas esperto mentres a súa familia dorme, limpando ou organizando a casa. «Cando todos están na cama, eu dou voltas pola casa, limpo as velas usadas, acendo os interruptores para que queden correctamente aliñados e asegúrome de que todo estea ordenado», asegura. «Odio baixar pola mañá e que haxa cuncas e pratos sucios. E é esgotador ir ao redor de cada vela limpándoa. Corto a cera da vela, limpo o vidro... esa é a miña fobia, que haxa unha mancha ao redor do interior dunha vela. Seino, é raro».
Noutro momento deste avance, David Beckham aparece discutindo con Victoria por deixar o sal fóra do seu sitio na cociña. «Limpo moi ben a cociña, non creo que a miña esposa o aprecie tanto, sinceramente», comenta fronte ás cámaras. «É tan perfecto», responde a deseñadora de moda e cantante, antes de asegurarlle ao seu marido que si o aprecia. «Non vos creades iso nin por un segundo. Soa tan sarcástica cando o di..», responde David entre risos.
O pasado mes de xullo Netflix confirmou que estaba a traballar nunha serie documental protagonizada por David Beckham, tras asinar co deportista un acordo de 16 millóns de libras -uns 18 millóns de euros-. Como revelou Beckham nunha publicación nas súas redes sociais en xullo do 2022, «a serie contará con arquivos inéditos, historias non contadas e entrevistas coas persoas que foron parte da miña viaxe». O proxecto, que aínda non ten título e está dirixido por Fisher Stevens, repasará a infancia da estrela do fútbol, as súas orixes e como se converteu nunha figura do mundo do deporte.
