O coronavirus ocupaba en xullo o sexto lugar entre as preocupacións dos españois, segundo o barómetro do Centro de Investigacións Sociolóxicas. O 9,3 % dos enquisados mencionaban esta cuestión ao ser preguntados. Con todo, o mes pasado só o 2,3 % dos que participaron na enquisa acordáronse do coronavirus. Hai outros 24 asuntos que lles parecen máis perentorios, como a situación económica, o paro, os problemas políticos e mesmo o medio ambiente, que sobe ata a quinta posición.
A situación epidemiolóxica, coas hospitalizacións e os falecementos en mínimos de toda a epidemia, xunto coa desaparición do covid do primeiro plano mediático, permite entender esta considerable baixada de sete puntos en tan só un mes. Un descenso que non ten nada que ver con que a cidadanía teña optado por desentenderse das cuestións sanitarias en xeral. De feito, a sanidade é a segunda preocupación que manifestan, só por detrás da crise económica. O 22,9 % das persoas preguntadas sinalan esta inquietude, máis que a do paro.
Ata novembro do ano pasado, cando a pobreza e a desigualdade subiu ao primeiro posto, a pandemia do coronavirus mantívose durante 18 meses consecutivos como a principal preocupación dos españois. O contaxio propio e, sobre todo, o de persoas próximas era ao que máis se referían os españois.