A prensa italiana sostén que a princesa estableceu a súa residencia en Córsega
18 abr 2022 . Actualizado á 20:28 h.A princesa Charlene de Mónaco volveu a aparecer xunto á súa familia nunhas imaxes publicadas en redes sociais con motivo da Pascua. A exnadadora non foi vista en público desde que regresou ao principado hai pouco máis dun mes tras permanecer ingresada por propia vontade nunha clínica suíza, polo que a súa verdadeira condición segue rodeada polo misterio. Tampouco publicara novas instantánea ata o de agora.
Nunha das fotografías, Charlene, co pelo moi curto, protagoniza un coidado posado familiar onda a piscina do palacio dos Grimaldi. Ela está sentada sobre o céspede, do mesmo xeito que os seus fillos, os príncipes xemelgos Jacques e Gabriella. Ao seu lado, o príncipe Alberto sitúase nunha posición máis elevada, cun xeonllo no chan. Todos eles visten en tons claros nun decorado perfecto, cun coello de Pascua e unha cesta de ovos. A imaxe, perfectamente estudada, ofrece máis un aspecto de posado institucional que de alegría e harmonía familiar.
A conta de Instagram oficial distribúe tamén outra fotografía na que aparecen o matrimonio e os seus fillos durante a celebración da misa do domingo de Pascua, oficiada polo capelán de palacio. A sesión de fotos tivo lugar poucas horas despois de que Alberto de Mónaco saíse da corentena á que estivo sometido despois de contaxiarse de covid-19 por segunda vez. O domingo presidiu en solitario a final do torneo Masters 1000 de tenis do principado.
O regreso de Charlene a Mónaco segue rodeado dun enorme segredismo, do mesmo xeito que sucedeu cando volveu de Sudáfrica tras permanecer seis meses para recuperarse dunha severa infección de oídos, nariz e garganta que a obrigou a pasar polo quirófano en varias ocasións. Segundo algunhas das súas amizades, estivo incluso a piques de morrer como consecuencia da súa doenza. Unha vez en Europa, ingresou por vontade propia nunha clínica suíza debido a un esgotamento que, segundo revelou o seu marido, non só era físico.
O pasado 13 de marzo, un comunicado emitido polos portavoces de palacio facíase constar que a princesa regresara a casa e estaba «feliz» de reencontrar á súa familia e achegados. Tamén se aseguraba que continuaría recuperándose no seu domicilio para, «nas próximas semanas», retomar as súas actividades oficiais, interrompidas desde que en maio de 2021 enfermou en Sudáfrica, o seu país natal, durante unha viaxe oficial. Esta volta ao traballo aínda non se produciu.
Segundo publicaron algúns medios italianos, ao seu regreso Charlene apenas permaneceu uns días en palacio antes de marcharse de novo sen asumir a súa axenda oficial nin facer fronte á atención mediática que esperta a súa figura. De acordo con informacións do Corriere della Sera, a muller de Alberto de Mónaco foise a Niza, onde colleu un avión privado con destino a Córsega en busca do anonimato e como parte dun «acordo co seu marido para non pedir o divorcio».