«Síntome realmente bendicida», afirma en redes sociais a princesa de Mónaco, ingresada nun centro especializado de Europa
10 dic 2021 . Actualizado á 20:17 h.Sete anos cumpren este venres os pequenos príncipes de Mónaco, Jacques e Gabrielle, e celebran por primeira vez este día lonxe da súa nai. A princesa Charlene, que se atopa ingresada por vontade propia nalgún centro especializado de Europa para tratarse a doenza que lle causou un esgotamento físico e mental, non estará en palacio onda os seus fillos.
A exnadadora felicitou desde a distancia aos xemelgos con varias imaxes que publicou no seu perfil de Instagram e nas que os seus fillos aparecen en pixama, rodeados de globos e cunha gran torta en forma do número 7. «Feliz aniversario, os meus bebés. Grazas a deus por bendicirme con tan marabillosos nenos. Síntome realmente bendicida. Con amor, mamá», escribiu onda as fotos a muller de Alberto de Mónaco.
«Misterio» é quizais a palabra máis repetida nas últimas semanas á hora de falar de Charlene de Mónaco e a doenza que a obrigou a apartarse do mundo e da súa familia. A Princesa, que regresaba ao Principado o pasado 8 de novembro despois de seis meses no seu Sudáfrica natal -afectada dunha grave infección en oídos, nariz e larinxe que a obrigou a pasar por quirófano en tres ocasións-, abandonaba pouco despois a vida pública e tamén o palacio para ingresar nun centro e intentar volver ser a que era. Un «abandono temporal da vida pública» tras o cal Alberto de Mónaco, pedindo "respecto" pola privacidade da súa esposa, aseguraba que o que agora necesitaba a exnadadora é «tranquilidade e descanso».
Desde entón non deixaron de sucederse os rumores relacionados con Charlene. Mentres ningúns aseguran que está gravemente enferma e que padece unha enfermidade incurable -algo que foi desmentido polo seu marido-, outros apuntan a que estaría ingresada nun hospital suízo especializado en saúde mental e adiccións. Outros, como a xornalista Pilar Eyre nas páxinas de Lecturas, afirman que o motivo de tal repentina desaparición débese a que a princesa quedaría desfigurada tras someterse a un estiramento facial en Dubái. O propio príncipe Alberto desmentiu este e outros rumores que circulan ao redor da saúde da princesa consorte.
Desde o Principado gárdase un silencio absoluto acerca da saúde de Charlene, mentres se especula coa posibilidade de que a familia volva reunirse para celebrar xuntos o Nadal.
