A canle estrea este xoves a serie «Extraterrestres: eles están entre nós», un exahustivo repaso de testemuños e experiencias atribuídos a avistamentos
10 abr 2021 . Actualizado ás 00:02 h.Avistamentos no espazo aéreo. Supostos contactos con figuras estrañas. Testemuños de abducións. A canle DMax estrea este xoves (22.30 horas) «a serie máis completa das realizadas en España sobre avistamentos», afirma Bibiana González, directora de programación de Discovery España, ao falar de Extraterrestres: eles están entre nós.
A serie, conducida polo xornalista e divulgador Lorenzo Fernández Bo, parte dos documentos desclasificados en 1992 polo Ministerio de Defensa. Da investigación obtiveron 80 expedientes e un total de 1.900 páxinas, moitas delas relacionadas con experiencias vividas por militares españois.
«As testemuñas non amenten, cóntanche a súa verdade e hai que pescudar a que responde », asegura Fernández Bo, que argumenta que cando nunha base militar baléiranse tres cargadores e dispáranse 140 balas ante a aparición unhas figuras estrañas non pode ser un simple froito da imaxinación.
O presentador asegura que, nesta materia, a procura de explicacións é «máis apaixonante que o resultado final». A serie ten como colaboradores á escritora e investigadora Laura Falcó, e os xornalistas e ufólogos Josep Guijarro e Miguel Pedrero. «Ter unha proba infalible é moi complicado, pero hai unha serie de patróns que se repiten», afirma Falcó.
En oito episodios, o programa solicita testemuños por toda España. En Galicia , recolle experiencias como a relatada por un home que asegura ter sido abducido en Tui e o triángulo de luces observado nos noventa por militares da polvoreira das Gándaras, en Lugo.