Os transplantes de órganos baixan polo covid, pero 11 puntos menos en Galicia
SOCIEDADE
O CHUAC liderou os enxertos cardíacos no sistema de saúde estatal
19 ene 2021 . Actualizado ás 19:56 h.Entre marzo e maio, nas peores semanas da primeira onda do covid-19, diminuíron os transplantes de órganos en Galicia e no conxunto do sistema de saúde de España. Iso supuxo que a finais do 2020 as cifras fosen inferiores ás de 2019: contabilizáronse en total 4.425 enxertos en España (2.700 de ril, 1.034 de fígado, 336 de pulmón, 278 cardíacos, 73 de páncreas e 4 de intestino), son un 18,8 % menos que o ano 2019; e 328 en Galicia (141 de ril, 103 de fígado, 53 de pulmón, 29 de corazón e 2 de páncreas), que son 26 menos e supoñen unha redución menor, dun 7,3 %. As cifras foron, pois, 11,5 puntos mellores en Galicia.
A pesar da menor actividade, o Complexo Hospitalario Universitario A Coruña (CHUAC) foi o que trasplantó máis corazóns en España; e o segundo en enxertos pulmonares, só superado polo Vall d'Hebrón catalán. A cifra de pulmonares na Coruña foi, así mesmo, a máxima desde que realiza esta intervención. Do total de transplantes galegos, en Santiago materializáronse cen (53 renais e 47 hepáticos), o resto na Coruña. A pesar do descenso total das intervencións, no CHUAC o ano pasado creceron os enxertos cardíacos e pulmonares respecto ao exercicio precedente.
Tamén diminuíron as doazóns: en España foron 1.777, un 22,8 % menos; e en Galicia 110 (26 menos que no 2019; só en Ourense e Santiago superaron as do 2019), un 19,1 % menos. A taxa de enxertos foi mellor na comunidade, 121,5 transplantes por millón de habitantes, fronte a 93,3 no conxunto do sistema estatal de saúde. Tamén de doazóns, pois foron 40,7 por millón de habitantes, tres puntos por amais da media estatal, resalta a Consellería de Sanidade. Un dos datos nos que Galicia empeora é o de negativas familiares: un 19,7 % na comunidade, fronte a un 14 % en España.
A maioría dos transplantes realizáronse a partir de órganos procedentes de persoas falecidas. Aínda que en 268 casos no conxunto da sanidade española, 257 enxertos renais e 11 hepáticos, facilitáronos doantes vivos; en Galicia foron 17 os transplantes de doante vivo, renais, o 12 % do total dos de ril.
A idade media dos doantes de órganos en Galicia foi de 60,7 anos e de 60 anos no conxunto estatal. A maioría das doazóns, o 64,5 % en Galicia, procederon de persoas falecidas por mor dun accidente cerebrovascular.
O ano pasado, 2.184 persoas asinaron cartóns de doantes en Galicia e hai xa 118.006, tal e como resalta a Consellería de Sanidade. Ademais hai 928 doantes máis de medula ósea e 12.458 rexistrados, agrega.
En lista de espera
A lista de espera de persoas pendentes dun transplante de órgano é de 4.794 en España, 95 menos que hai un ano; e 271 en Galicia: na comunidade hai 202 persoas que precisan un ril, 31 un fígado, 18 un pulmón, 12 un corazón e 8 máis un páncreas, segundo Sanidade.
Os datos estatais expúxoos Silvia Calzón, secretaria de Estado de Sanidade; e os autonómicos Jorge Aboal, director xeral de Asistencia Sanitaria, Marisa López, directora da Axencia de Doazón de Órganos e Sangue; e Encarnación Bouzas, coordinadora autonómica de transplantes.
Os datos galegos son «profundamente satisfactorios», valoraron os representantes de Sanidade. Silvia Calzón afirmou que o sistema estatal de transplantes «resistiu o impacto» da pandemia e demostrou a súa «fortaleza». Ademais, logrouse un novo máximo de 197 transplantes infantís, destacou Calzón.