O gañador do MIPDoc Project Pitch penétrase nunha misión da NASA
13 abr 2020 . Actualizado ás 16:44 h.Un documental da produtora galega Somadrome, cuxo domicilio social se atopa no concello coruñés de Oroso, converteuse no primeiro español que gaña o MIPDoc Project Pitch, e fíxoo co seu traballo Behind Lucy (Detrás de Lucy). O MIPDoc Project Pitch acaba de ter lugar na cidade francesa de Cannes.
O argumento do documental: a misión da NASA chamada precisamente así, Lucy. «Seguimos a un grupo de catro persoas da NASA ao longo de todo proceso de desenvolvemento desa misión dende a súa aprobación no 2017», explica Ruth Chao, xerente da produtora.
E esa misión é descubrir os segredos ocultos de Xúpiter. «Non foi doado acadar o acceso único a ese equipo de enxeñeiros e científicos, e é a primeira vez que lle deixan a uns galegos», engade Ruth Chao. En concreto, a sonda Lucy -que está previsto que saia da Terra en outubro do ano que vén- visitará varios dos troyanos dese planeta; ou sexa, o grupo de asteroides que comparten con el a súa órbita. E iso, en opinión da propia NASA, «axudaranos a coñecer mellor as orixes do noso sistema solar». Un paso significativo, porque se calcula que hai ao redor dun millón de troyanos de máis dun quilómetro de diámetro na órbita de Xúpiter. O primeiro deses corpos astronómicos foi descuberto en 1906 e púxoselle o nome de Aquiles, o heroe da guerra de Troia, e na actualidade hanse identificado algo menos de sete mil.
O MIPDoc é un mercado internacional de documentais que se celebra todos os anos na cidade de Cannes en paralelo ao MIPTV, que á súa vez é un dos mercados de televisión máis grandes do mundo e baixo cuxo marco ten lugar aquel. No MIPDoc compiten tan só cinco proxectos das máis importantes produtoras internacionais, entre as cales figura a partir de agora Somadrome.
Un reto técnico
«Unha cousa que nos chamou a atención foi como se enfrontaron a un reto técnico que nos parecía imposible: como Lucy vai sobrevoar o maior número de asteroides evitándoos porque deseñaron unha enxeñosa traxectoria que vai seguir a sonda, e tamén o deseño duns grandes paneis para capturar a enerxía solar que chega a Xúpiter, que é moi pouca», engade a xerente da empresa.
«Desde o primeiro momento tivemos claro que había que facerse un oco no panorama internacional, porque depender do mercado nacional nun produto tan de nicho como é o documental non ía ser sostible», di a xerente ao rememorar a formulación inicial. E así, aos poucos a empresa foi especializándose en documental científico: «Non foi algo premeditado, foi xurdindo co tempo. A ciencia é un tema que me apaixona, así que fixen un par de producións de esa temática e tiveron moi boa acollida».
O debut de Ruth Chao nese mundo e con outra empresa tivo lugar con 2050. How soon is now, un documental do 2006 no que abordaba os problemas do cambio climático cando aínda non era un tema que ocupase as primeiras páxinas dos xornais nin medio minuto nos telexornais. «Naquel entón non era un tema do que a sociedade fose consciente, e foi moi desconcertarche descubrir que había algo tan preocupante sobre a que a ciencia alertaba, pero que a xente aínda descoñecía». Somadrome rompeu esquemas despois con traballos como The Climate Blue Print (O desafío do clima), Is Anybody Out There? (Hai alguén aí fóra?) e a serie Space Colonies (Colonias espaciais).
Somadrome é unha produtora de documentais que conta con obras emitidas en canles de todo o mundo, entre eles France 5, ZDF, UK TV, TVE, Discovery Channel (Estados Unidos), Welt (Alemaña), Foxtel (Australia), Mediaset, Ao Jazeera, KBS (Corea do Sur) e Kultur (Rusia). Ruth Chao xa gañou un premio Maestre Mateo co mencionado 2050. How son is now (traballando noutra empresa) e estivo proposta este ano para outro.