É coñecido pola súa participación en programas de televisión e a súa férrea defensa do lobo
22 may 2019 . Actualizado ás 20:43 h.O divulgador ambiental e director do Gabinete de Historia Natural, Luis Miguel Domínguez, permanece na Unidade de Coidados Intensivos (UCI) nun hospital madrileño, con prognóstico grave tras sufrir un ictus o pasado sábado. Segundo informaron a Europa Press fontes próximas á familia, Domínguez atópase en coma inducido e pasou satisfactoriamente as primeiras 48 horas, as máis críticas nestes casos.
O coñecido divulgador e defensor do lobo a través da asociación Lobo Marley, estaba o pasado sábado cuns amigos cando de súpeto sufriu un ictus. Os amigos actuaron rapidamente ao darse conta de que os síntomas coincidían cos desta doenza e pediron con urxencia unha ambulancia medicalizada. De acordo con estas fontes próximas á familia, aos poucos estanlle reducindo a sedación segundo vai respondendo, pero subliña que o prognóstico aínda é grave e descoñécese a evolución que, en todo caso será lenta.
Domínguez acabábase de casar hai dúas semanas e atopábase preparando a manifestación anual en defensa do lobo ibérico que se celebrará o próximo mes de xuño en Madrid.