A ministra pide agora realizar unha análise rigorosa e a Organización Médica defende o método científico
20 novs 2018 . Actualizado ás 05:00 h.O Plan para a Protección da Saúde fronte ás Pseudoterapias menciona explicitamente á acupuntura e aos produtos homeopáticos. Pero unha semana despois de presentarse, e antes de dalo a coñecer aos colexios profesionais, a ministra de Sanidade, María Luisa Carcedo, asegurou que sería «ousado» incluír estas dúas terapias na listaxe sen ter realizado antes unha análise rigorosa.
Son ou non seudoterapias? No caso da homeopatía non hai moita dúbida. «É un produto baseado nunha ciencia falsa», di o presidente do observatorio contra as seudociencias da Organización Médica Colexial, Jerónimo Fernández. Pero non se expresa do mesmo xeito coa acupuntura. «É seudoterapia cando a utilizas nun proceso que non procede , se a utilizas comoc oadyuvante nalgún tipo de dor ninguén dirá nada, porque hai algúns artigos de evidencia científica debidamente homologados», explica. Sen dúbida, «o médico naturista que lle rompeu un ventrículo a unha paciente non sei que técnica de acupuntura usou», lamenta Fernández.
O responsable do observatorio defende o plan presentado polos ministros de Ciencia e Sanidade, xa que, «está moi ben estruturado e defende o método científico e a evidencia, non só nos procedementos que se ofertan á poboación no Sistema Nacional de Saúde, senón en todos aqueles que se publicitan como de pretendido beneficio para a saúde», conclúe.
No plan cuéstionase claramente a acupuntura ao asegurar que o 59,8 % dos cidadáns creen na utilidade terapéutica damesma , «a pesar de non estar avalada polas evidencias científicas dispoñibles». Este texto indignou aos defensores da acupuntura. «Esas afirmacións si que son pseudocientíficas», asegura Fernando Salgado, coordinador do Máster de Acupuntura e Moxibustión da Universidade de Santiago. Salgado defende a evidencia científica desta práctica e alude ao Cochrane, o Sancta Santórum do método científico, que admite a súa utilidade na prevención da hemicrania episódica ou na dor lumbar crónica. En moitas outras patoloxías, como a depresión, a dor por cancro en adultos, o insomnio ou o glaucoma afirma que non é posible establecer conclusións fiables.
O coordinador do máster esixe unha regulación destes estudos, xa que a OMS estableceu unhas directrices para a capacitación da acupuntura, e que se loite contra o intrusismo na profesión. «Somos os primeiros interesados en que haxa unha regulación dos medicamentos non convencionais e que se persiga o intrusismo», insiste.
O máster que imparte a USC nesta área paraliza as prácticas no Hospital Clínico
A polémica aberta ao redor deste tipo de terapias fixo que o Sergas paralice temporalmente as prácticas que se realizaban no Hospital Clínico de Santiago deste máster de acupuntura da USC. O xefe do servizo de anestesioloxía do CHUS, Julián Álvarez Escudero , quen casualmente é tamén o decano da Facultade de Medicina, tomou esta decisión para evitar o alarmismo na poboación, «pero estou convencido de que a acupuntura non é unha seudoterapia». Respecto ao máster, o máis probable é que esta sexa a súa última edición, pero non pola polémica suscitada, insiste Escudero , senón que se trata dunha decisión meditada desde hai tempo pola falta de profesores para impartilo.