«The Last of Us 2» e «Andor», as series do trinque que chegan en abril

Agardados regresos de series e estreas destacadas converten ao mes de abril en tempada alta da ficción televisiva. As distopías terán un espazo destacado coa agardada segunda tempada de The Last of Us, a sétima de Black Mirror, a despedida dO conto da criada e a estrea da adaptación do cómic O Eternauta. Tamén chegarán o desenlace de Andor e o thriller rodado en Galicia O xardineiro.

«The Bondsman»

3 de abril, en Prime Vídeo. Hub Halloran (Kevin Bacon) é un cazarrecompensas asasinado a quen o diaño trae de volta á vida para atrapar aos demos que lograron escapar do inferno. Nesta misión, contará coa axuda da súa familia, da que leva anos distanciado. Busca unha segunda oportunidade para vivir, amar e conectar coa música country.

«Pulso»

3 de abril, Netflix. Unha serie para vivir en primeira persoa a tensión nas urxencias dun hospital de Miami cunha repartición que lidera Willa Fitzgerald.

«Dying for Sex»

4 de abril, Disney+. Miniserie de oito episodios con Michelle Williams que conta a historia real dunha muller con diagnóstico de cancro terminal que rompe con todo para cumprir coa súa lista de cousas que facer antes de morrer.

«Karma»

4 de abril, Netflix. A aposta surcoreana do mes cun drama de acción que entrelaza de forma violenta a vida de seis persoas tras un accidente.

«O conto da criada»

8 de abril, Max. O mundo distópico que debuxa Margaret Atwood chega ao seu fin nunha historia que quedou en albas coa fuxida en tren da protagonista June Osborne (Elisabeth Moss) dunha Canadá que xa non é segura. Toca pasar páxina.

«Infiel»

8 de abril, Filmin. Serie sueca con guion de Ingmar Bergman e Liv Ullman nunha historia de amor, paixón e traizón con sabor nórdico entre un director de cine e unha actriz.

«Black Mirror»

10 de abril, Netflix. Seis novos episodios que son, como é habitual, unha incógnita na súa narrativa e manterán a tensión, o drama e a ambientación de ciencia ficción habituais.

«Vicios ocultos»

11 de abril, Apple TV+. Suporá a volta de Jon Hamm (Mad Men), esta vez convertido nun administrador de fondos recentemente divorciado e despedido da súa empresa que decide dedicarse a roubar casas nunha zona adiñeirada.

«O xardineiro»

11 de abril, Netflix. Un thriller sobre un viveiro que é, en realidade, a tapadeira dun negocio clandestino de asasinatos por encargo xestionado por Elmer (Álvaro Rico) e a súa controladora nai (Catalina Sopelana). Todo cambiará cando Elmer namórase dunha das súas vítimas.

«Doctor Who»

12 de abril, en Disney+. O Doutor coñece a Belinda Chandra e comeza unha épica procura para volver á Terra. Pero unha forza misteriosa impide o seu regreso e o equipo da Tardis, que viaxa no tempo, debe afrontar novos perigos e maiores inimigos.

«The Last of Us»

14 de abril, Max. A segunda tempada da viaxe de Ellie (Bella Ramsey) e Joel (Pedro Pascal) nunha trama que promete ser unha copia case exacta do exitosos videoxogo. Tensión, drama, acción, miles de infectados, violencia por milleiros e a guitarra de Gustavo Santaolalla,... Pouco máis se pode pedir.

«Government Cheese»

16 de abril, Apple TV+. Unha comedia surrealista ambientada na California dos anos setenta para narrar o regreso dun preso (David Oyelowo) onda a súa muller (Simone Missick) e os seus dous fillos tras cumprir condena.

«Andor»

23 de abril, Disney+. Na segundo e última tempada da serie, o líder rebelde Cassian Andor (Diego Luna) continúa a súa loita contra o Imperio. Andor é unha das ficcións derivadas máis aplaudidas de Star Wars e narra os días previos a Rogue One, quizais a mellor película da saga (á marxe da triloxía orixinal). Os personaxes e as súas relacións intensifícanse a medida que a guerra se achega e Cassian Andor convértese nunha peza crave para a Alianza Rebelde. A medida que aumentan os riscos, as traizóns, os sacrificios e os conflitos de intereses, todos veranse sometidos a proba.

«You»

24 de abril, en Netflix. Na quinta e a última tempada da serie, Joe Goldberg volve a Nova York para gozar do «e comeron perdices», pero as pantasmas do pasado e os seus escuros desexos sacoden a súa vida perfecta.

Mariliendre

27 de abril, Atresplayer. A serie musical dirixida por Javier Ferreiro (e producida polOs Javis) con Blanca Martínez Rodrigo no papel dunha raíña de Carramela (barrio gai madrileño) que, dez anos despois do seu éxito, ver atormentada polo seu pasado e busca aos que foron os seus amigos. Completan a repartición Martin Urrutia, Yenesi, Álvaro Jurado e Nina, entre outros.

«Astérix e Obélix: O combate dos xefes»

30 de abril, en Netflix. A partir da obra orixinal de Uderzo e Goscinny, a serie de animación recrea o cómic Astérix e Obélix: O combate dos xefes. Roma está desesperada por conquistar a última aldea independente en toda a Galia, fogar destes guerreiros. O segredo da superioridade dos galos na batalla é unha poción máxica, pero cando o druída encargado de preparala perde a memoria, os aldeáns quedan á súa sorte fronte ao poder de Roma.

O eternauta

30 de abril, Netflix. Salta á pequena pantalla a premiada novela gráfica de Héctor G. Oesterheld, con Ricardo Darín como protagonista nun mundo distópico xeado que afronta unha ameaza mortal.

O longo río das almas

30 de abril, Movistar Plus+. Miniserie baseada no bestseller homónimo de Liz Moore sobre dúas irmás separadas por culpa das drogas. A historia está protagonizada por Amanda Seyfried e ambientada nunha Filadelfia que é epicentro da crise de opiáceos.

---

---

---