Trátase dunha serie de animación para adultos de dez episodios
09 ago 2023 . Actualizado ás 08:56 h.Apple TV+ caracterízase por estrear con menos fruición que a líder das plataformas, Netflix ou mesmo con outras que lle seguen á zaga, como HBO Max ou Prime Vídeo. É coma se buscasen a excelencia do streaming, aínda que non sempre o logran, e as súas series, con mellor repercusión por ter menos subscritores, ás veces pasan case desapercibidas a pesar da súa calidade, e outras non cumpren os requisitos para convencer o público.
O último desas estreas é Un planeta estraño, unha serie de animación para adultos de dez episodios dispoñible desde hoxe en Apple TV+. A priori a proposta é apetecible para este mes de agosto onde moitos teñen máis tempo e dedican o seu lecer de vacacións a intentar pasar o intre sen moitas complicacións.
A ficción está baseada na novela gráfica número 1 en vendas do New York Times e o fenómeno das redes sociais do mesmo nome, Un planeta estraño ofrece unha mirada hilarante e perspicaz a un mundo afastado non moi diferente ao noso. «E se o noso mundo non fose o único onde a existencia fose absurda?», pregúntanse no tráiler. A serie está ambientada nun peculiar mundo de tons morados e rosas pasteis onde seres azuis, con quen é doado identificarse, exploran o absurdo das tradicións humanas cotiás.
Detrás desta creación están Dan Harmon, creador de Rick and Morty (que pode verse en HBO Max e conta con seis tempadas) e Community, e o autor de superventas do New York Times Nathan W. Pyle. Alex Bulkey, que gañou un Óscar por Pinocho , de Guillermo del Toro, Corey Campodonico (BoJack Hoserman, Tuca & Bertie), Lauren Pomerantz (Saturday Night Live, The Ellen DeGeneres Show), Amalia Levari (Over the Garden Wall, Harvey Beaks), Steve Levy (Rick and Morty, Community) e Taylor Alexy Pyle son produtores executivos. Un planeta estraño está producida por Apple Studios e ShadowMachine
Os tres primeiros episodios da serie están dispoñible s desde este 9 de agosto e despois irán estreándose un novo cada mércores.