Que está a pasar coas salas de festa para que cada vez se mobilicen desde Santiago máis estudantes?
VIVIR SANTIAGO
A sala Chanteclair é a sede de varias festas universitarias que se organizan durante o curso
26 oct 2024 . Actualizado á 13:09 h.E ti, lembras esas viaxes en autobús os venres e os sábados á noite para chegar á sala de festa máis próxima? O hábito, permeable entre xeracións, repíteno cada fin de semana os mozos de Santiago aos que as discotecas do Ensanche e da zona vella xa se lles quedan pequenas. Situadas nos arredores, a capacidade é maior e a experiencia é distinta. Doa Dana, en Touro, xa pon a vista na data da súa próxima apertura, programada para mediados de novembro. Mentres, Chanteclair, en Pontecesures, ultima os detalles para a celebración do Halloween, con especial atención ao público universitario. Aínda que por proximidade sempre foron unha opción máis que notable, nas rúas de Compostela está máis presente o nome destes espazos: «Si, é certo que cada vez hai máis xente de Santiago que salgue por aquí».
Confírmao José Villanueva, parte de Chanteclair. Pensa que, pola proximidade —a distancia que separa ambos os puntos por estrada é de vinte minutos—, a capital sempre foi un punto forte para atraer público á sala. Iso si, agora notan «un pequeno repunte». Proba deles son as imaxes que hai pouco máis dunha semana viralizábanse nas redes. Desde as oito da tarde dun luns, unha enorme cola —de máis de 120 metros— chamaba a atención a moitos veciños do Ensanche. Baixaba desde a rúa República Arxentina, viraba e avanzaba pola rúa Ramón Cabanillas ata chegar a Matrix, o pub que se converteu nun referente para as previas en Compostela. Eran mozos que buscaban unha entrada para a que xa se anuncia como a maior festa universitaria de Halloween de Galicia, organizada por @salseo_usc en Chanteclair. «Pensabamos que iamos ter repercusión, pero vender un luns, á falta de 16 días para que se celebre, 2.100 entradas é unha tolemia», contaba o organizador.
Desde finais do curso pasado, a sala converteuse en sede de varias festas universitarias. «Levabamos anos querendo facer festivais para este público», explica José Villanueva. Pensa que os mozos, cada vez que saen, son máis esixentes. Despois da pandemia decidiron facer menos eventos pero, nas súas propias palabras, «de maior calidade». Organizan un par deles ao mes e, aínda que a mocidade é a quen máis buscan, cada festa está pensada para un tipo de público. «Neste cambio tamén inflúe o aumento dos grandes festivais que se celebran no verán. Nos reinventamos acompañando aos artistas e á variedade musical dunhas temáticas e escenografías acordes aos tempos», asegura.
Así, as pantallas, as luces e os visuais son un selo máis de Chanteclair. «Facer unha festa en Santiago está moi ben, pero remata sendo sempre o mesmo. Neste caso, permite moitas cousas. Por exemplo, hai pantallas para facer animación e, ao ser máis persoas, tes máis marxe de investimento», explicaban a La Voz os organizadores con motivo da anterior macrofiesta universitaria. A maiores está a capacidade, unhas 3.000 persoas que sería impensable meter en calquera local da cidade: «É unha discoteca moito máis grande en comparación ás que hai aquí, que non hai nada así. Como moito chegan a 500 ou 700 persoas, que non é nin a metade da capacidade á que pode chegar Chanteclair». Agora, coa ruta trazada, xa só queda subirse ao bus a noite de Halloween e divertirse.