Dous guionistas de Teo e Dodro conquistan (sen guion) ás redes sociais co seu humor en «Todo mal»
TEO
Marcos López e Carla Núñez traballan no programa de televisión «Land Rober», puxéronse en agosto fronte ás cámaras para gravar o seu propio vídeo pódcast e xa teñen máis de 44.000 seguidores
19 mares 2023 . Actualizado ás 05:00 h.A finais de agosto, dous guionistas do programa de televisión Land Rober Tunai Show (TVG) pasaron de estar detrás a pórse diante das cámaras e convertéronse en todo un fenómeno nas redes sociais cun vídeo pódcast de humor en galego, Todo mal. Con máis de 44.000 seguidores —e subindo—, Carla Núñez e Marcos López recoñecen que «non esperabamos chegar a tanta xente, e menos en tan pouco tempo».
«O noso entorno apóianos moito e tamén lles sorprende porque, aínda que non o pareza, somos os dous moi tímidos. Nas reunións familiares, por exemplo, eu sempre fun a típica que está alí calada. Xa de nena non quería destacar nin ser o centro de atención», indica a dodresa (da aldea de Vigo ) de 28 anos. Ela estudou Comunicación Audiovisual na USC e, especializada no entretemento e comedia, atopou unha horma á medida do seu zapato no teense de 36 (da Florida, en Rarís), coñecido tamén polos seus «aloucadas dobraxes en galego» na canle de YouTube Tele Jaita.
«Ao traballar xuntos, pasamos moitas horas falando, dicindo parvadas e creando. Un día dixémonos: "Molaría facer un programa para redes, con esas conversas de bar e de café que nunca van a ningún punto". Queriamos ter algo máis noso no que dar renda solta a nosa creatividade, sen que ninguén teña que aprobar as nosas ideas nin acomodalas, asumindo toda a responsabilidade de acertar ou faiar, e executando nós os nosos propios chistes», contan. O formato, relatan, xurdiu por casualidade, comentando entre risos as anécdotas do Reggaeton Beach Festival de Nigrán .
Así botou a rodar un proxecto que repasa a actualidade en clave cómica e que ten moito de improvisación: «Unha vez que temos un tema e catro chistes, imos sen guión e enredamos sobre todo canto se nos ocorre. O que intentamos é que sexan temas de aquí ou traelos cara o noso, facer país e que a xente se sinta identificada. Por exemplo, cando saíu a famosa canción de Shakira con Bizarrap sobre Piqué, o que fixemos foi traducila ao que diría a cantante se falase como unha galega». Este contido marcou un antes e un despois para Todo mal. «Foi un bum, tivo unha animalada de reproducións e supuxo chegar a unha cantidade de xente incrible, desde novos a maiores».
Agora cada vez é máis habitual que os recoñezan pola rúa e reciben mensaxes por Internet de todo tipo, «incluso de xente que nos ve desde fóra e aprende galego con nós. É bonito cando chega unha mensxe de alguén que tivo un día de merda e non se puido levantar da cama, pero ti fuches capaz de facelo rir. Como cómico éncheche moitísimo e é curioso que o noso humor guste tanto a un público de 30 anos como a os de 70. En xeral, a xente é moi riquiña. Nós non temos haters... tamén é certo que fuximos de sitios conflitivos como Twiter ou Facebook», aclaran con sorna.
Eles non se expoñen facer o seu programa noutra lingua que non sexa o galego, aínda podendo chegar a máis público, porque «criámonos, traballamos e vivimos en galego, o ton que usamos é a nosa retranca e non tería sentido facelo en castelán. Da moita pena cando outros creadores de contido en galego nos contan que non foron capaces de dar o salto e tiveron que cambiar de idioma para poder seguir traballando nisto». Nun futuro, iso si, a Carla e Marcos gustaríalles chegar a facer o vídeo pódcast con público.
E con que non están dispostos a chancear? Para eles, o límite é «o que a nós mesmos non nos faga graza. É dicir, eu nunca me riría dun chiste machista ou racista e, polo tanto, non os fago», responde Carla, quen asegura que «nunca me afectou ser muller para dedicarme ao humor», á marxe de recibir máis mensaxes sexistas ou fóra de lugar que o seu compañeiro falando do seu físico. «Parece que por ser muller teñen a leira aberta para flirtear ou dicir certos comentarios incómodos. Non fai falta que me digas se estou guapa ou fea... sempre hai algún que se permite opinar deste tipo de cousas e notas que é algo desproporcionado. Se a Marcos lle pasa unha vez, a min 10. De todas formas, está ben normalizar que as mulleres tamén podemos facer comedia e temos tanta ou máis graza que calquer home. A cuestión é que queiras escoitar e que estés disposto a rir, veña de quen veña o chiste».
Ela é quen introduce os temas nun programa que xa se pode seguir a través de Instagram, TikTok, YouTube, Spotify, Twitch e iVoox; aínda que son os dous os que propoñen o contido de cada semana, inspirándose nos temas virales e nas noticias que len nos medios de comunicación, como unha de La Voz de Galicia que falaba da pouca efectividade do Tinder en Barbanza para ligar. «Temos a enorme sorte de que vivimos en Galicia e aquí pasan cousas que noutro sitio serían impensables e fan gracia pola forma como se din e se tratan. Eu abro o Instagram e, de forma inconsciente xa empezo a ver cousas que encaixarían no programa. Fago capturas para non esquecerme delas e ao final do día ao mellor teño xa 20 noticias que poden dar moito de si», explica a guionista de Dodro .