Filomena, a aizkolari de 82 anos de Texexe, xa non poderá partir máis leña, vítima dos lastros
TEO
O empedrado do núcleo tradicional teense xera problemas de mobilidade e o seu estado motivará unha denuncia ao Concello
23 novs 2021 . Actualizado ás 21:38 h.Filomena Míguez Míguez, veciña de Texexe (Teo), acaba de cumprir 82 anos de idade cunha saúde envexable, pero tamén cun boa dose de mala sorte, xa que tivo que celebrar o seu aniversario coa man esnaquizada e recentemente operada. A lesión produciulla unha caída ao tropezar cun dos lastros que fai máis de dez anos colocaron na rúa principal da aldea, coñecida polo valor patrimonial dos seus hórreos e a gran parra que cobre a empedrada rúa principal.
En realidade, dun tempo para acó Texexe está no mapa porque é a aldea na que vive Filomena, toda unha aizkolari porque ata hai un mes manexaba como ninguén a súa machada para «fender na leña», como ela mesma lembra co xesto triste porque practicamente dá por feito que non poderá volver á súa privilexiada normalidade. «Gustaríame, pero non conto», afirma. «Penso que vai a recuperar», matiza a súa filla Ana, acostumada vela superar outras lesións igual ou máis graves que esta última.
A familia de Filomena Míguez sabe que ela está feita doutra pasta e ten moi claro que o empedrado de Texexe ten a culpa do que lle ocorreu a ela o pasado 28 de outubro e a outros veciños nos últimos anos.
A súa caída tamén lle impediu cumprir unha das súas ilusións, xa que a súa famosa maña cos troncos de leña provocou que, tras a publicación da súa historia en Teovivo , a TVG organizase para ese día un programa especial con todo un personaxe do mundo do corazón, Kiko Rivera, fillo de Isabel Pantoja, ao que Filomena lle ía demostrar que iso de cortar leña «non é cousa de forza», xa que ao golpe certeiro coa súa machada, que de lixeira non ten nada, engádese a habilidade do uso dunha cuña de ferro para troncos máis grandes.
Esta muller, de axilidade envexable, non leva nada ben perder autonomía. «Dóenme os ósos de non facer nada porque eu non son de estar quieta, e se estou na casa enfermo porque non teño gañas de comer», laméntase ao observar o tractor de leña que quedou sen cortar mentres a súa filla e a súa neta danlle mimos e ánimos. Tamén lembra cando Texexe non tiña empedrado, un pavimento que colocou o Concello de Teo co aval de Patrimonio para desgusto da veciñanza, xa que Filomena non é a única que se caeu ao tropezar cunha pedra. A súa familia presentará unha denuncia contra o Concello para esixir responsabilidades. «Ela vai necesitar rehabilitación e tratamento, pero puido terse matado», afirma a súa filla Ana.