A startup compostelá EnergHius, entre as 100 finalistas de South Summit Madrid para ser o proxecto máis innovador do mundo
SANTIAGO CIUDAD
Foi creada para posicionarse como un actor crave no sector da microelectrónica para a xestión eficiente de enerxía en dispositivos electrónicos
14 may 2025 . Actualizado á 12:36 h.A startup compostelá EnergHius está entre as 100 finalistas de South Summit Madrid 2025, á que se presentaron 4.500 candidaturas de diferentes países. O comité encargado da selección de finalistas valorou o grao de innovación, a escalabilidade do negocio, o seu potencial de crecemento, o seu atractivo para os investidores e a capacidade do equipo que está detrás do proxecto. A cita madrileña, que se desenvolverá do 4 ao 6 de xuño, contará con presenza de emprendedores e innovadores como Greg Hoffman, responsable da evolución de marca de Nike; Marc Randolph, cofundador de Netflix; ou Dennis Hong, profesor da UCLA e experto mundial en robótica.
EnergHius naceu no seo da Universidade de Santiago (USC) e é unha compaña especializada no deseño de circuítos microelectrónicos avanzados para a recolección de enerxía. Foi creada para posicionarse como un actor crave no sector da microelectrónica e desenvolver solucións innovadoras para a captación e xestión eficiente de enerxía en dispositivos electrónicos, con aplicacións na internet das cousas (IoT), sensores autónomos e dispositivos de baixo consumo. Dirixida por Daniel García como CEO e Óscar Pereira como CTO (director de tecnoloxía), xurdiu do Centro Singular de Tecnoloxías Intelixentes (Citius), como resultado dunha liña de investigación pioneira liderada polos catedráticos Paula López, Víctor Brea e Diego Cabello, e o profesor Fernando Pardo. A firma contou co asesoramento da Área de Valoración, Transferencia e Emprendemento (AVTE) da USC, así como o acompañamento no proceso de transferencia tecnolóxica e no desenvolvemento do seu plan de negocio.
O lanzamento de EnergHius produciuse en paralelo á posta en marcha da Cátedra Televés de Microelectrónica da USC, que favorecerá a xeración dun ecosistema de formación de talento e desenvolvemento tecnolóxico neste ámbito. EnergHius está recoñecida pola Xunta como Iniciativa de Emprego de Base Tecnolóxica, distinción que avala a viabilidade e o potencial de impacto do proxecto, e que reforza o compromiso da empresa coa creación de emprego cualificado e co desenvolvemento da tecnoloxía de vangarda en Galicia.
Xunto a EnergHius, outra compaña galega figura entre as 100 finalistas: Envita Dixital Solutions, de Vigo, que integra historias de vida e proxectos de persoas maiores para personalizar a atención, fortalecer os vínculos e mellorar o benestar emocional e social.