A familia de Rois que perdeu parte da súa vivenda di que «o susto non dá pasado»
07 feb 2026 . Actualizado á 05:05 h.«O susto non dá pasado», asegura o veciño de Rois que perdeu unha parte da súa casa despois de que unha parede antiga do inmoble derrubásese debido, na súa opinión, á choiva caída nos últimos tempos. Onte, o entullo da vivenda xa estaba retirado e, con iso, o camiño despexado. A familia, que reside na aldea de Busto da parroquia de Ermedelo, non ten previsto volver edificar esa parte da casa, pero se protexer a parede que quedou exposta, así como reforzar un muro.
«Estamos servidos co resto da casa, polo que non imos edificar», explicou o veciño, en alusión a que teñen dous cuartos e un baño na parte non afectada. De momento, el e a súa muller están a facer vida na vivenda da súa filla, situada na mesma aldea, e así seguirán «mentres a casa deles non estea máis segura», explica a proxenitora.
Namentres, os afectados non paran de recibir chamadas de familiares e veciños, para interesarse pola súa situación. Tamén o Concello de Rois ofreceulles o seu apoio, de modo que o alcalde Ramón Tojo e os concelleiros Mercedes Basante e José Manuel López foron ata a aldea para falar coa familia e preguntarlle se necesitan algo. Así mesmo, o rexedor trasladoulles que non haberá problema coa licenza municipal para realizar os traballos necesarios.
O veciño afectado lembrou onte que o derrubamento da parede e, con ela, dous cuartos e un baño, provocou un «ruido moi forte, máis ca o dunha tormenta» pero, afortunadamente nese momento non había ninguén nesa parte da vivenda xa que o matrimonio estaba na cociña.
Tras o sucedido, queda en pé «media casa», suficiente para que os moradores fagan a vida, segundo afirman. «Non se esperaba isto, pero é así a vida», dixo onte o veciño afectado, quen aínda estaba a organizar parte dos aveños caídos dentro dos mobles, que quedaron inservibles, incluído o cuarto de baño.
Agradecemento a todos os que se interesaron pola súa situación
O matrimonio afectado polo derrube de parte da súa casa mostra o seu agradecemento aos veciños da aldea que, nada máis decatarse do sucedido, acudiron a axudar no que fose necesario, como recoller os aveños e pertenzas persoais que estaban nos mobles, incluída a documentación dos dous moradores da vivenda. Tamén agradece o interese dos familiares e de todos aqueles que se interesaron pola súa situación, incluído o Concello.
«Foi moito cousa e non foi nada, pero afecta», sinalou onte a filla, en alusión a que é unha desgraza o derrube de parte da casa, pero máis o puido ser se os seus pais estivesen a esa hora durmindo no cuarto que se derrubou. De feito, a súa nai facía pouco tempo que saíra da estancia, despois facer a cama. «As casas antigas da aldea son así; non sabes como as construíron», engade a filla. Neste caso, a auga de tanta choiva puido afectar a unha parede que, segundo o titular da vivenda, non era de moi boa calidade, de modo que abrandou e veuse abaixo, dándolle o susto das súas vidas.