Convértese na cuarta fichaxe do conxunto galego
15 ene 2025 . Actualizado á 19:50 h.O Padronés Cortizo segue confirmando os nomes dos corredores que integrarán o seu persoal neste curso 2025. O equipo galego aposta por mozos promesas do ciclismo nacional e internacional como base do seu proxecto. Así, a escuadra padronesa acaba de adiantar a incorporación do valenciano Héctor Cela, que debutará como sub 23 ás ordes de Marcos Serrano despois de protagonizar unha brillante campaña no Picusa Academy.
Héctor Cela (Cadeira, Valencia, 2006) foi un dos corredores máis destacados no conxunto do Porriño, asinando vitorias importantes na Challenge Volta ao Barbanza e no trofeo Moixent. Ademais, foi terceiro na Volta ao Concelho de Loulé Juniores. Quedou ás portas do podio na Volta a Portugal de categoría xuvenil, na que finalizou cuarto. «Considérome un corredor versátil, que se desenvolve ben en calquera tipo de terreo, aínda que o meu punto forte é a montaña», sinala o levantino.
Cela chega a Padrón recentemente acadada a maioría de idade. A finais de decembro cumpriu 18 anos. Faio cos pés na terra, consciente de que tocará adaptarse ao cambio de categoría. «É certo que se se presenta a oportunidade de loitar por gañar carreiras non a vou a desaproveitar, pero o meu obxectivo para esta campaña debe ser axudar ao equipo en todo o que necesite», asegura. O corredor celebra a súa incorporación ao Padronés Cortizo. «Decidín fichar porque desde o primeiro momento confiaron en min. Ademais, teñen unha estrutura cun potencial moi grande e unha grande organización que me pode axudar bastante no futuro. Estou moi ilusionado para a nova tempada, xa que me incorporo a un equipo que ten unha idea do ciclismo e uns valores que coinciden cos meus e contribuirán a que siga progresando».
Cela convértese na cuarta fichaxe do Padronés tras Adam Strejcek, Jordi Artigues e Ibán Gutiérrez. Ademais, confirmouse a continuidade de Martín Rey, Marc Torres, Fran Bennàssar, Pablo Bonilla, Samuel Flórez, Luis López, Óscar García e Maksym Bilyi.