O centro de saúde de Melide leva quince días sen pediatra e non hai data para a incorporación dun novo especialista

O centro de saúde de Melide acumula dúas semanas sen pediatra, e non hai data para a incorporación dun novo especialista á praza, que está vacante, despois de que a profesional que a ocupaba conseguise outra nun centro diferente. A propia pediatra despediuse das familias nun carta de agradecemento que pode lerse na porta da consulta, na que a xerencia da área sanitaria de Santiago e Barbanza confía que se volva a prestar servizo «en breve», tendo en conta que «no contexto actual de escaseza de pediatras, estamos a buscar activamente a un profesional que acuda de maneira estable a ocupar esa praza».

É a alternativa á que tamén están acostumadas as familias de Arzúa, desde onde tamén chegan voces discordantes cando o servizo de pediatría derívase a centros médicos de localidades veciñas. A resposta desde a xerencia da área sanitaria de referencia é sempre a mesma: hai escaseza de pediatras, e iso supón un obstáculo á hora de cubrir tanto vacacións, como baixas e vacantes, que é o caso que agora ocupa no centro de saúde do municipio melidaos.

A axenda para todo este mes está bloqueada, tal e como indican desde a área sanitaria e poden comprobar, a través da aplicación móbil do Sergas, as familias, ás que se lles comunicou a principios de maio o adiamento das citas calendadas para o mes, aínda que as autoridades sanitarias aseguran que «non se anularon citas, e a axenda de pediatría non ten demoras». A alternativa que se lles ofreceu é a que indican desde a xerencia da área de sanitaria: os menores ata tres anos reciben a atención dun pediatra nos centros médicos de Arzúa, de Boimorto, ou do Pino, e, a partir desa idade, asumen as cartillas os médicos de familia, que, sosteñen desde o Sergas, «están perfectamente capacitados para iso». A xerencia da área de Santiago defende que, dese xeito, os pacientes «teñen totalmente garantida unha atención sanitaria de calidade e sen demoras».

A situación, que afecta a uns 800 pacientes de ata 15 anos de Melide, Santiso e Toques,  non é nova en concellos nos que unicamente teñen un pediatra no centro de saúde. As vacacións e as baixas do especialista non se cobren con outro profesional. E a solución á que recorren as autoridades sanitarias non convence as familias, que reivindican a cobertura permanente da praza, polos prexuízos que lles causa ter que desprazarse a outros concellos para recibir atención. 

---

---

---