Ofrecerá asesoramento para o impulso de proxectos vinculados ao territorio
04 novs 2023 . Actualizado ás 05:05 h.Melide é un dos municipios nos que a Consellería de Promoción do Emprego e Igualdade puxo o ollo para despregar os medios e o persoal necesarios para asesorar ás persoas que aposten por pór en marcha o seu propio negocio, acompañándoas en todo o proceso co obxectivo de que resulte unha experiencia de éxito. Na céntrica confluencia entre a travesía do Convento e a rolda da Coruña, comezará, en próximas datas, a funcionar na localidade un polo de emprendimiento e apoio ao emprego que será de referencia para o conxunto da comarca, e tamén para os demais municipios da contorna.
Será o primeiro que abra as súas portas na área de influencia de Santiago, e integrarase nunha rede que, ata final de ano, contará cunha quincena de oficinas, distribuídas por toda a xeografía galega. O de Melide é o único polo de emprendimiento e apoio ao emprego que a Xunta ten previsto pór en marcha, no que resta de ano, na provincia coruñesa, onde hai dúas que se atopan xa en funcionamento. Concretamente, en Ferrol e en Coristanco; ningún deles, xa que logo, nas proximidades da capital galega, o que, a priori e inicialmente, amplía o ámbito de cobertura da oficina da localidade melidense a un bo número de municipios.
O ámbito territorial é, en efecto, un factor determinante no servizo de asesoramento personalizado que prestan os técnicos que traballan nos polos, tendo en conta que a metodoloxía que se aplica para acadar un emprendimiento de éxito está adaptada, ademais da as necesidades particulares de cada proxecto, á contorna no que está previsto o seu desenvolvemento. Así, outra das funcións dos técnicos é detectar retos e necesidades do ecosistema empresarial da zona.
Actualmente, son dez os polos de emprendimiento que operan en toda a comunidade, onde tamén se ofrece o servizo desde Mondoñedo, Friol, A Fonsagrada e Monforte, na provincia de Lugo; Verín, O Barco de Valdeorras e O Carballiño, na de Ourense; e Silleda, na de Pontevedra. Ata final de ano, tamén está previsto abrir oficinas en Vilanova de Arousa, O Porriño, Sarria, e Baños de Molgas.
Unha nova oportunidade para asentar poboación no rural
A dinamización do territorio, a través da creación de emprego, é o principal obxectivo que se persegue a través do asesoramento especializado e personalizado que ofrecen nos polos de emprendimiento, que tecen unha rede xeográfica da que emerxe unha nova oportunidade para asentar poboación no rural galego. A localización das oficinas non só facilita o acceso ao servizo dos residentes en determinada zona; tamén favorece o desenvolvemento de iniciativas de emprendedores que buscan desenvolver o seu proxecto empresarial, e de vida, no rural, convencidos de todo o potencial que ofrece, así como das posibilidades das novas tecnoloxías á hora de botar a andar e pórse a cargo de un negocio.
Desde a apertura do primeiro polo en xullo do ano pasado, o servizo de asesoramento atendeu, en toda a comunidade, a máis de 700 persoas emprendedoras. Con elas, os técnicos realizaron ao redor de 2.200 sesións de traballo. Entre o conxunto de usuarios, un 10 por cento proceden de fóra de Galicia. Deles, a metade son retornados, e entre o 50 por cento restante, sobresaen os que, procedentes doutros países, buscan mellores oportunidades laborais.