O Concello de Ames prevé abrir hoxe con normalidade os comedores escolares tras o brote de gastroenterite
AMES
Os técnicos de Sanidade determinarán a forma de proceder unha vez inspeccionen esta mañá os centros educativos
20 may 2024 . Actualizado á 05:00 h.O Concello de Ames prevé abrir hoxe os comedores escolares con total normalidade, tras o brote de gastroenterite que afectou a pasada semana a escolares do colexio de Ventín e, en menor medida, de Agro do Muíño. No entanto, desde o concello indican que á primeira hora de hoxe técnicos da Consellería de Sanidade realizarán unha última comprobación nos centros, e serán eles quen determine a forma de proceder. O Concello convocou unha reunión interdepartamental das áreas municipais de alcaldía, promoción da saúde e educación e os seus servizos técnicos, á que están invitados representantes da Consellería de Sanidade.
O Concello de Ames garante que, en calquera caso, está asegurada a prestación do servizo con seguridade: «Ante calquer impedimento que poida xurdir o Concello de Ames ten capacidade para prestar o servizo de forma segura», expresou o alcalde Blas García; ben con medios propios como prevén, ou con comida traída do exterior.
Un centenar de afectados
Desde Sanidade ratifican que o brote está estabilizado. Explican que ademais dos 65 casos atendidos en Urxencias e notificados ao 061, realizáronse enquisas epidemiolóxicas para esclarecer os feitos, datos cos que «constan arredor de 100 persoas afectadas», en liña coas apreciacións á alza que se realizaban desde as ANPA amienses xa o venres. A maior parte de pacientes tiveron os primeiros síntomas entre o xoves e o venres. Foron todos casos leves e sen ingresos en planta de hospitalización. A inspección de instalacións, análises de alimentos e procultivos a pacientes determinarán as causas do brote.