Charly López adiantou aos locais nada máis comezar o partido e na segunda parte Diego Iglesias igualou para o Cambados
22 sep 2025 . Actualizado á 17:56 h.O Compos salvou os tres puntos no tempo de desconto: 2-1. No minuto 94, o defensa central Pablo Crespo sentenciou un partido que ía camiño do empate. Antes, Charly López adiantou aos santiagueses no primeiro tempo e Diego Iglesias igualou para o Cambados na segunda parte.
O equipo de casa saltou ao tapete de San Lázaro con moita enerxía e unha velocidade máis que o rival. Tratou de sorprender con fútbol vertical desde o minuto inicial. Sentiuse cómodo no arranque de partido e xa moi pronto se puxo por diante no marcador. Ao cumprirse o minuto catro, Charly bateu a David Conde cun disparo afastado e con moita potencia.
Intentou reaccionar o Cambados de inmediato. O equipo amarelo sacou unha boa contra, pero xusto no momento da definición o atacante disparou lixeiramente desviado. Foi un ataque tímido dos visitantes, pois a posesión e o ritmo do xogo seguiuno marcando o Compos, que xa non chegou con tanto ímpeto aos dominios do cérbero Conde.
O Cambados estirou un pouco as súas liñas, pero sen crear problemas en ataque. O Compos, que defendeu con orde, e apenas tivo que intervir con risco, baixou a intensidade do seu xogo e foise relaxando ao sentir que o marcador era favorable. Os minutos foron transcorrendo sen pena nin gloria, aínda que Armental dispuxo dunha boa ocasión para incrementar a renda. O seu disparo, potente e raso, detívoo con algúns apuros o meta visitante.
O maior susto da primeira parte para os de casa chegou nos minutos finais do primeiro acto. Tras unha acción do Cambados pola súa banda dereita, o balón acabou dentro da área branquiazul e alí Diego Iglesias de tacón case sorprende a Álex Cobo.
Vantaxe mínima
A primeira parte concluíu coa vantaxe mínima dos xogadores de Secho Martínez, que foron mellores que o rival, pero non puideron manter durante todo o tempo o bo ritmo co que comezaron o duelo.
A segunda metade, cos mesmos protagonistas sobre o céspede de San Lázaro, empezou cunha grande ocasión para o Compos. Antón Guisande recibiu con tempo para pensar e realizar unha boa manobra dentro da área. Regateou ao porteiro e a porta baleira enviou o balón contra o lateral da rede.
Máis lento
O balón seguiu en poder do Compos, o partido xogou máis no campo do Cambados e o equipo visitante defendeu con orde e sen arriscar, con medo a recibir o segundo. Os minutos foron pasando sen grandes noticias.
O Cambados intentou sorprender nunha contra. Nun descoido dos centrais do Compos, Santorum foise como un lóstrego e xerou unha ocasión de perigo, pero o seu centro non atopou rematador. Pasada a hora de partido, cun Compos máis apático, lento e descoidado, Secho intentou buscar maior frescura cun triplo cambio, máis agresividade e velocidade, pero xusto despois das modificacións o Cambados logrou o empate. Diego Iglesias foi o protagonista da reacción dos visitantes cun forte lanzamento.
O Compos desorganizouse un pouco. Entrou Goris para darlle maior equilibro e pausa ao equipo, que viviu os seus peores momentos. De feito, o Cambados puido darlle a volta ao marcador nunha acción de contragolpe que non puido culminar Diego Iglesias.
Tras o tanto do conxunto adestrado por Rubén Cornes, ao Compos custoulle moito levantar cabeza. Intentouno máis co corazón e a medida que se foron esgotando os minutos os nervios apoderáronse dos branquiazuis, incapaces de chegar con tanta claridade á área do adversario. O grande alivio co que se atopou o Compos no segundo tempo foron os seis minutos que se concederon de prolongación. Alberto Lago foi expulsado por unha dura entrada sobre Aarón Martínez e no lanzamento da falta Pablo Crespo conseguiu o gol da vitoria. No último suspiro, no desconto, os tres puntos quedaron na capital galega.
FICHA TÉCNICA(2) COMPOSTELA: Álex Cobo, Valín (Aarón Martínez, min 65), Damián (Diego Rodríguez, min 65), Pablo Crespo, Quico González, Diego Uzal, Samu Rodríguez (Goris, min 76), Adrián Armental, Antón Guisande, Cañi (Parapar, min 65) e Charly López (Jorge Maceira, min 78).
(1) CAMBADOS: David Conde, Álex Fernández, Álvaro Tavares, Fran Álvarez, Alberto Lago, André Piñeiro (Anxo Martínez, min 92), Seydou Drame, Diego Hernández (Rancaño, min 78), Diego Iglesias (Nicolás, min 85), Noel Chaves e Gregorio Santorum.
GOLES: 1-0, min 4: Charly López.
1-1, min 68: Diego Iglesias.
2-1, min 94: Pablo Crespo.
ÁRBITRO: Beatriz Costa Arribas (A Coruña). No 93, expulsou por dobre amoestación a Alberto Lago, xogador do Cambados. Tamén viron a amarela os locais Quico González e Pablo Crespo; e o visitante Fran Álvarez.
INCIDENCIAS: Partido da terceira xornada do grupo primeiro da Terceira Federación disputado en San Lázaro, con 1.200 afeccionados na tribuna.