Vegalsa inviste tres millóns no Cash Marca da Sionlla, o máis grande da súa rede
SANTIAGO
O centro, inaugurado este mércores, conta cunha sala de vendas de máis de 3.200 metros cadrados e dez mil referencias para as canles profesionais
17 sep 2025 . Actualizado á 21:39 h.A Sionlla suma e segue. A compaña de distribución alimentaria Vegalsa-Eroski inaugurou este mércores no polígono compostelán o Cash Marca máis grande de toda a súa rede, composta por 16 centros entre Galicia e Asturias. O novo centro, que substitúe ao que operaba no polígono do Tambre, ocupa os números 41 e 43 da rúa Castela e León, e será veciño de parcela do hipermercado Eroski, aberto no 2022.
Este espazo, enfocado ás canles profesionais de hostalería e restauración, conta con 3.172 metros cadrados de superficie, ademais dun aparcadoiro exclusivo para os clientes de 115 prazas cubertas, ademais de catro puntos de recarga para vehículos eléctricos. Sumando o veciño supermercado, a firma galega roza os 7.000 metros cadrados de superficie nas que traballan 160 persoas, 53 delas só no Cash Marca.
«Para Vegalsa Eroski esta apertura é moi importante, xa que supón reforzar o compromiso con Santiago. Xunto ao hipermercado, conseguiremos unha oferta ampla e completa para calquera tipo de cliente, xa sexa consumidor final ou profesionais hoteis, restaurantes e cafeterías», destacou o director xeral da compaña, José Manuel Ferreño. O acto tamén contou coa presenza do director de negocio de Cash Marca, Francisco Crespo Montoto; e do director xeral de Comercio e Consumo da Xunta, Gabriel Alén, que departiron co medio centenar de traballadores, entre os cales hai veteranos que xa estaban no Tambre e novas incorporacións; e tamén con clientes do sector hostaleiro que quixeron coñecer de primeira man un recinto no que se investiron tres millóns de euros. Boa parte do presuposto destinouse á habilitación do local, así como ao seu equipamento, maquinaria e instalacións.
Todo o espazo preséntase adaptado á nova imaxe corporativa de Cash Marca, que desde abril deste ano utiliza as cores laranxa e verde como identidade visual.
Produto fresco e marca propia
O novo centro de distribución abre cun catálogo de dez mil referencias en alimentación, droguería, enxoval e adega, con formatos especialmente adaptados ás canles profesionais. Para os seus promotores, o «valor diferencial» de Cash Marca é a súa oferta de 1.700 referencias de produtos frescos dispoñibles nas seccións de carnicería, peixaría e froitería, que contan con venda personalizada. Nos andeis é posible atopar produtos de provedores nacionais e locais, ademais de ter acceso a un catálogo dunha marca propia, Servihostel, ademais dunha adega especializada e o servizo de compra a través da rede.
Ademais dos centros citados, Vegalsa Eroski conta en Santiago con centros propios ou franquiados das marcas Eroski e Familia, e a súa estrutura comercial complétase coa moderna plataforma de mercancías xerais situada en Sigüeiro, ademais dos centros de produtos frescos da Coruña, Vigo e Ourense.