Álex Cobo, que chega procedente do VDE Ourense, novo porteiro do Compostela
SANTIAGO
É o segundo reforzo para o vestiario de Secho
19 jun 2025 . Actualizado á 18:54 h.A portería do Compostela ten xa un novo inquilino. Trátase de Álex Cobo Padillo (Sant Boi do Llobregat, 1995). O cérbero chega a San Lázaro tras unha boa campaña no VDE Ourense, equipo que acabou logrando o ascenso. Vén coa intención sumar o seu cuarto ascenso á Segunda Federación. Asinou por unha tempada.
O Compos faise cos servizos dun porteiro con capacidade para sacar o balón xogado e con boas cualidades baixo paus. Chega tras o lograr o ascenso co VDE Ourense, equipo no que estivo os dous últimos anos. Vestirá de branquiazul despois dunha campaña na que só encaixou 14 goles en 28 partidos. En todos eles foi titular, conseguindo o campionato con varias xornadas de antelación. Neses 28 duelos, logrou deixar en 17 ocasións a portería a cero, parando na xornada 30 un penalti no decisivo encontro ante o Estradense, que foi segundo.
O deste verán non foi o último ascenso logrado por Álex Cobo. Tamén o conseguiu co Fabril e o Arousa. Co filial coruñés asinou a súa primeira experiencia en Galicia, tras saír do Lleida. No cadro herculino estivo catro tempadas, nas que disputou 87 partidos. Posteriormente, pasou polas filas do Arousa (dous anos e 36 partidos), do Bergantiños (un curso e só seis encontros) e do VDE Ourense, con 64 partidos nas súas pernas. Álex Cobo chega ao Compos co obxectivo de lograr o desexado e obrigado ascenso.
Cobo é o segundo reforzo para o Compos de Secho despois de concretarse esta mesma semana a incorporación de Diego Uzal, un mediocentro con experiencia no fútbol galego, que tamén asinou por unha tempada. O coruñés chega a San Lázaro procedente do Bergantiños, onde disputou 33 partidos de liga no curso pasado, perdéndose só un por sanción. Acumulou 2.750 minutos.