Os socialistas quedarán con só dous edís, tras arrincar o mandato con 6
13 may 2025 . Actualizado á 05:00 h.A ruptura do grupo municipal socialista consumarase esta semana. O venres, expresamente. Ese será o día en que os concelleiros expulsados do PSOE se desligarán oficialmente do grupo político que representa á formación do puño e a rosa no Concello, salvo que antes medie algunha directriz do Xulgado de Primeira Instancia número 3 de Santiago que dea amparo á petición de Gonzalo Muíños, Mercedes Rosón, Mila Castro e Marta Álvarez de manterse nas súas filas ata que se xulgue a súa demanda contra a expulsión do partido. Os catro solicitaron medidas cautelares nese sentido. De feito, a vista para dirimir sobre tal solicitude celebrouse o venres pasado.
Pero o Concello ten os seus propios tempos e, á marxe do prazo que se tome a Xustiza para resolver sobre tal medidas, o goberno local anunciou xa que convocará para o venres desta semana a sesión na que os catro causarán baixa oficialmente no grupo socialista. Onte aínda non se convocou, pero o portavoz do goberno, Míriam Louzao, confirmou que a sesión pechará a semana en Raxoi. A convocatoria está pendente da celebración hoxe da comisión que haberá de informar os outros dous asuntos que Goretti Sanmartín levará a debate plenario: a taxa turística e un cambio na relación de postos de traballo para poder aprobar a oferta pública de emprego do 2025.
En realidade, o debate plenario cinguirase a eses dous temas. Porque a desvinculación de Muíños, Rosón, Castro e Álvarez do grupo socialista non é unha cuestión que competa dirimir ao pleno, aínda que a súa saída forzada da representación socialista só será firme cando se lle dea conta á corporación.
Os catro seguirán en Raxoi
A expulsión do grupo obedece á petición formulada nese sentido polo PSOE, tras apartalos previamente do partido, e unha vez que o secretario municipal informou á alcaldía de que se dan as circunstancias para que os sancionados adquiran a condición de concelleiros non adscritos, o paso previo á súa desvinculación do grupo socialista.
Os catro manterán as súas actas en Raxoi, o que deixará ao PSOE con tan só dous edís, Sindo Guinarte e Marta Abal, quen fai meses que volveron á disciplina de partido, aínda que inicialmente compartiron cos seus xa excompañeros o pulso público coa dirección local que deveu da votación da ordenanza das vivendas de uso turístico fai xa case un ano.
A ruptura formal do grupo socialista —publicamente é evidente xa desde hai tempo— permitirá ao PSOE reorganizar a súa estrutura e o seu programa de traballo no Concello con Guinarte e Abal, mentres que os catro expulsados, en diante sen filiación orgánica ningunha, pasarán a representarse a si mesmos.
A convocatoria do pleno chega despois de que o PSOE acusase a Sanmartín, fai un par de semanas, de dilatar esta crise e advertísea de que podería recorrer á vía xudicial. A alcaldesa defendeu desde entón que o goberno seguiu escrupulosamente o procedemento para garantir os dereitos de todas as partes.
Coas expulsións acordadas en xaneiro, e ratificadas en marzo polo comité de ética e garantía do PSOE, os socialistas manteñen que a separación dos catro concelleiros do seu grupo municipal «chega tarde», aínda que, ante o anuncio da convocatoria do pleno, agora toca dar «a benvida» á «regularización» da situación. «Non só é o lóxico, senón o xuridicamente correcto», afirma o secretario xeral do PSOE en Santiago, Aitor Bouza.
Para Bouza, xa era hora de que Guinarte, «o voceiro elixido» polo partido en xaneiro pasado (a formación decidiu substituír a Gonzalo Muíños nesa función antes da súa expulsión, que estivo precedida pola suspensión de militancia por ano e medio), poida «tomar posesión e representar ao PSOE, pois é o único que o pode facer», di o dirixente socialista en relación a Guinarte.
Santiago soporta máis presión turística por residente que Barcelona e Sevilla
O pleno terá que decidir sobre a proposta de ordenanza turística que a Xunta de Goberno aprobou nunha sesión extraordinaria o pasado venres e que levará á sesión corporativa do día 16, xunto coa dación de conta do pase á condición de concelleiros non adscritos dos catro expulsados do PSOE. As tarifas por estancias turísticas irán desde 1 a 2,5 euros, en función da categoría dos establecementos, e aplicaranse por un máximo de cinco días. E, segundo esa proposta, os establecementos terán que facer autoliquidacións semestrais ao Concello coas cobranzas por esa taxa.
O goberno insiste na necesidade para compensar con ese imposto os gastos que os composteláns teñen que asumir polo volume de servizos que hai que manter para dar cobertura tamén aos visitantes, e afirma que Santiago está entre as primeiras cidades do Estado con maior presión turística por residente. A súa cociente é de 9,45 turistas por habitante, superando case en cinco puntos a destinos como Barcelona e Sevilla, di.