Profesores da Universidade de Santiago concentraranse ante o reitorado para reclamar melloras laborais

Un grupo de case 200 profesores da Universidade de Santiago concentraranse este venres, ás 12.00 horas diante do reitorado, para esixir melloras na súa condición laboral. Así o anunciaron a través dun manifesto asinado pola Plataforma de profesorado axudante doutor da USC, figura laboral que adoita ser a máis usada para acceder á carreira académica.

«Por unha cuestión de dignidade profesional, consideramos que deben darse pasos decididos para a estabilización do conxunto do colectivo acreditado á categoría superior», explican no documento, no que critican que «a nula política de persoal e financiamento no sistema universitario español posterior á crise do 2008 provocou que na actualidade as persoas que accedemos a estas prazas esteamos sobrecualificadas para a figura laboral».

«Consideramos que a estabilización debe ser unha posición estratéxica da Universidade: afianzar e consolidar a estrutura do noso persoal é fundamental nun momento de transición xeracional dentro da Universidade», reclamaron tamén no documento, onde piden á USC que priorice ás figuras máis precarizadas: «No curso pasado fomos a única categoría laboral na que se mantivo unha bolsa de solicitantes. As promocións a profesor titular e catedrático non tiveron que agardar».

A resposta

Desde o reitorado da USC recoñeceron sentirse sorprendidos pola protesta cando «o noso equipo aínda non tiña rematada a proposta de estabilización para o 2025. Estamos traballando nas estimacións económicas antes de comunicarlla», admitiu o vicerreitor de Profesorado, Ernesto González, quen afirmou que a Universidade acelerou os procesos máis que ningunha outra institución académica galega, ademais de asegurar que «o noso compromiso é tratar de manter e reforzar esta liña».

---

---

---